Bitist um Kjarvalsverkin

Barnabarn Jóhannesar Kjarvals ásakar borgaryfirvöld um að halda þúsundum listaverka meistarans ólöglega í vörslu sinni. Dómsmál hans gegn Reykjavíkurborg verður þingfest í Héraðsdómi Reykjavíkur á morgun. Forsaga málsins er sú að skömmu áður en Kjarval veiktist og var fluttur á sjúkrahús árið 1968 var vinnustofa hans við Sigtún tæmd og rúmlega 5.000 listaverk og 1.100 bækur úr hans eigu fluttar á Korpúlfsstaði. Þar voru munirnir geymdir í sautján ár en síðan þeir færðir í hirslur Kjarvalsstaða þar sem þeir eru enn. Ingimundur Kjarval, barnabarn Jóhannesar, hefur undanfarin ár reynt að endurheimta muni afa síns, því hann telur verulegan vafa leika á að málarinn hafi í raun gefið borginni þá. Síðustu fimm árin hefur hann skrifað til embættismanna í borgarkerfinu en fá svör fengið og því hefur hann höfðað mál gegn Reykjavíkurborg. Málið verður þingfest í Héraðsdómi Reykjavíkur á morgun. Ingimundur segir að með dómsmálinu verði hægt að eyða þeim vafa sem ríkir um eignarhaldið á verkunum. "Fjölskyldan á þetta ekki pínulítið og borgin ekki pínulítið. Annað hvort á Reykjavíkurborg þetta eða fjölskyldan. Afi skrifaði aldrei undir neitt, það er ekki til nein gjafayfirlýsing og engin yfirlýsing er til frá Reykjavíkurborg um að hún hafi þegið nokkuð að gjöf," segir hann. Úrskurði dómararnir Ingimundi í vil vill hann að verkunum verði skilað aftur til erfingja Kjarvals. Ingimundur segir að misræmi sé á milli tveggja skráa yfir verkin sem gerðar voru 1968 og 1985. Svo virðist sem helmingur bókanna sé glataður og einhver málverkanna líka. Steinunn Valdís Óskarsdóttir borgarstjóri vildi lítið tjá sig um málið þegar haft var við hana samband í gær. "Ég hef fengið bréf frá Ingimundi í gegnum árin og kynnt mér málið en ég held að það sé þess eðlis að það verði að reka það fyrir dómstólum. Það er mismunandi túlkun á því hvað þarna fór fram á sínum tíma og þannig er fjölskylda Kjarvals ekki samstíga í málinu."