Rainer fursti borinn til grafar

Rainer fursti af Mónakó var borinn til grafar í dag en hann lést í síðustu viku, 81 árs að aldri, eftir erfið veikindi. Jarðarför furstans fór fram í dómkirkjunni í Mónakó, á sama stað og hann gekk að eiga leikkonuna Grace Kelly fyrir tæpum fimmtíu árum, en hann var jarðsettur við hlið hennar. Fjöldi fyrirmenna var við jarðarförina, þar á meðal flestar konungsfjölskyldur Evrópu. Rainer var fursti í Mónakó í 56 ár, en sonur hans, Albert, hefur þegar tekið við af honum.