Vonast eftir enn meiri hræringum

"Það er spurning hvort um skammgóðan vermi eða langvarandi tryggt vöruverð sé að ræða," segir Jóhannes Gunnarsson, formaður Neytendasamtakanna, spurður um verðstríð matvælaverslana. Hann segir neytendur hagnast en það sé spurning hvernig stríðinu ljúki, hvort þetta sé einungis fyrsta lota af mörgum. Jóhannes segir að fram að þessu hafi matvöruverslanir raðað sér í ákveðna röð á markaðinum og að verið sé að gera nokkurs konar uppreisn gegn því ástandi. "Það er alveg ljóst að neytendur hafa skammtímahagnað af þessu en langtímahagnaður á eftir að koma í ljós." Neytendasamtökin vona að verðstríð síðustu vikna eigi eftir að ýta undir meiri hræringar á matvörumarkaði en Jóhannes segir augljóst að menn gefi ekki mjólkina til lengri tíma. Laufey Steingrímsdóttir, sviðsstjóri rannsókna- og þróunarsviðs hjá Lýðheilsustöð, er að vonum ánægð með hið lága vöruverð sem landsmenn hafa notið síðustu vikur. Hún segir gott að lágvöruverslanir hafi boðið hollustuvörur, eins og ávexti og mjólkurvörur, á mun lægra verði en þekkst hefur. "Þetta ástand hefur verið nokkurs konar auglýsing fyrir hollar vörur og þar af leiðandi hvatt til aukinnar hollustu," segir Laufey. "Samt sem áður hefur þetta verðstríð gengið svolítið út í öfgar og verið ágætis skemmtiatriði. Persónulega hef ég haft gaman af að fara út í búð undanfarið en starfsfólkið er eflaust þreytt eftir annasama daga.'' Samkvæmt heimasíðu Hagstofunnar lækkaði verð dagvöru um 2,7% milli mánaða, sem rekja má til verðstríðs á matvörumarkaði. Það hefur þó ekki orðið til lækkunar á vísitölu neysluverðs, sem hækkaði um 0,75% frá fyrri mánuði, úr 239,7 stigum í 241,5. Þegar Fréttablaðið spurðist fyrir um verð á mjólk klukkan 14 í gær kostaði lítrinn 57 krónur hjá Bónusi en 59 krónur hjá Krónunni.