Verðstríðið harðnar enn

Ekkert miðar í friðarátt í verðstríði lágvöruverslana, sem sumar hverjar gáfu viðskiptavinum sínum mjólkina í dag. Þessi stríðsrekstur varð til þess að Mjólkursamsalan tvöfaldaði mjólkurframleiðsluna og er að verða uppiskroppa með ýmsa mjólkurvöru. Í morgun kostuðu tveir mjólkurlítrar eina krónu í Krónunni og Bónus átti svar við því og bauð sínum viðskiptavinum tvo mjólkurlítra á 90 aura. Kaskó og Nettó helltu sér þá í slaginn og gáfu hverjum viðskiptavin lítra af mjólk. Svo mikill er hamagangurinn í stríðinu um viðskiptavininn að verð breytist nú tvisvar og jafnvel þrisvar á dag. Þótt buddur og bein landsmanna njóti eflaust góðs af þá getur þetta varla talist arðbært fyrir verslanirnar sem kaupa mjólkurlítrann á 68 krónur og 44 aura í heilsölu og þá á eftir að leggja virðisaukaskatt ofan á. Hjá Mjólkursamsölunni fengust þær upplýsingar að helmingi meira hefði verið framleitt af mjólk í dag en á hefðbundnum þriðjudegi. Þá er mikil ásókn í þær vörutegundir sem notaðar eru sem vopn í verðstríðinu. Svo mikil að Mjólkursamsalan nær ekki að anna eftirspurn eftir ýmsum skyrtegundum og jógúrti. Það stefnir því í vöruskort hjá samsölunni um nokkurn tíma. Forsvarsmenn þeirra lágvöruverðsverslana sem fréttastofa Stöðvar 2 ræddi við í dag neituðu því alfarið að kostnaðurinn við að greiða niður mjólkurvörur verði til þess að aðrar vörur hækki og allir fullyrtu að þeir myndu áfram bjóða samkeppnishæft verð. Þó má ljóst vera að ekki þýðir að gefa vörur úr verslun ef hún á að standa undir sér. Þessu virðist fólk gera sér grein fyrir því dæmi eru um að fólk hafi hamstrað mjólkina í dag, annaðhvort til að belgja sig út áður en hún súrnar eða til að frysta. Fyrir þá forsjálu sem ætla að frysta birgðirnar er gott að hafa í huga að mjólkina þarf að þíða í kæliskáp því hún verður víst ansi ólystug ef hún er látin þiðna við stofuhita að sögn mjólkurfræðinga.