Bush og Berry verstu leikararnir

George Bush Bandaríkjaforseti og Halle Berry voru valin verstu leikarar ársins á Razzie-hátíðinni í gær. Gullna hindberið er veitt árlega kvöldið fyrir Óskarsverðlaunahátíðina sem verður í kvöld. Bush hlaut verðlaunin fyrir frammistöðu sína í mynd Michaels Moore, Fahrenheit 9/11, og Berry fyrir ógleymanlega frammistöðu í kvikmyndinni Kattarkonan. Töluvert minna er um glys og glamur á Razzie-hátíðinni en á Óskarnum en athyglin sem verðlaunin hljóta er engu að síður töluverð, enda er verið að verðlauna þá sem stóðu sig allra, allra verst í kvikmyndaiðnaðinum þetta árið. Það vakti athygli þegar Berry mætti á svæðið með óskarsstyttuna sína í höndunum og tók við Gullna hindberinu. Hún gerði raunar stólpagrín að sjálfri sér, lék eftir óskarsverðlaunaræðuna sína frá því í hitteðfyrra og þakkaði svo öllum sem komu að gerð myndarinnar um Kattarkonuna fyrir að gera sér kleift að komast frá toppi kvikmyndaiðnaðarins á botninn á innan við tveimur árum. Því næst dró hún umboðsmanninn sinn upp á svið og skipaði honum að lesa handritið yfir áður en hann mælti með næstu mynd. Berry tókst aðeins með naumindum að skyggja á Bush forseta með þessu atriði, því að þó að hann væri ekki á staðnum, og raunar ekki leikari heldur, fékk hann líka verðlaun sem helmingur versta kvikmyndaparsins. Hinn helmingurinn var Condoleezza Rice. Donald Rumsfeld var valinn versti leikari í aukahlutverki og Britney Spears versta leikkona í aukahlutverki fyrir stuðningsyfirlýsingu við Bush forseta á meðan hún tuggði tyggjó í gríð og erg. Óskarsverðlaunahátíðin verður sýnd í beinni útsendingu á Stöð 2 í nótt.