Rekin úr Idol og ráðin á PoppTíví

Það er kominn föstudagur og Fókus fylgir DVí dag. Að venju er af mörgu skemmtilegu að taka. Talað er við franska fegurðardís sem dansar með Ernu Ómars í Borgarleikhúsinu, mellur.net segja frá stríði sínu við feminísta og Idol-keppendur síðasta árs eru leitaðir uppi. Forsíðu blaðsins prýðir Elma Dögg Gonzalez, sem fólk ætti að kannast við úr Jing Jang á PoppTíví. Þegar ljóst var að strákarnir í 70 mínútum færu yfir á Stöð 2 þurftu PoppTíví-menn að leggja höfuðin í bleyti. Ekki var hægt að nota sama konsept, það fylgir Strákunum. Ákveðið var að keyra á Huga, þeim eina sem eftir var, og láta hann stjórna spurningaþættinum Jing Jang. Honum til aðstoðar voru síðan fengin Þorkell Máni Pétursson og Elma Dögg Gonzales, sem uppgötvaðist eftir þáttöku í forkeppni Idol Stjörnuleitar nú í haust. "Þau voru vond við mig. En ég klikkaði líka big time," segir Elma Dögg um þáttöku sína í Idol Stjörnuleit í haust. Klikkið kom þó ekki að sök þar sem Elmu var í kjölfarið boðið að vera í spurningaþættinum Jing Jang, sem er nú sýndur fimm sinnum í viku á PoppTíví.: Ekki með háa greindarvísitölu Elma þótti svo hress og skemmtileg í Idolinu að augun beindust fljótt að henni þegar velja átti í Jing Jang. Þetta er "óhefðbundinn" spurningaþáttur þar sem Hugi er spyrillinn. Til að byrja með var Eyvindur nokkur Karlsson með honum en það virðist ekki hafa gengið upp því Hugi er nú einn eftir. Máni og Elma fá síðan til sín gesti í hvern þátt til að reyna að brillera í keppninni. Það gengur misjafnlega. "Ég finn að ég er ekki með of háa greindarvísitölu í þessum þáttum," segir Elma í gríni. "Málið er að ég hef ekki áhuga á öllu. Það sem vekur ekki áhuga minn leiði ég hjá mér." Elma lýsir því hvernig fjölskyldumeðlimir eiga það til að skamma hana eftir þætti. En hún tekur sjálfa sig ekki alvarlega og veit að gott sjónvarp felst ekki í fullkominni framkomu. "Ég er líka með svo frjótt ímyndunarafl að ég þarf að passa mig. Að tala ekki áður en ég hugsa. Ég þarf að halda aftur af mér," segir Elma og viðurkennir að þetta viðhorf lykti af tepruskap. "Hann er tilkominn vegna þess að þjóðfélagið virðist vera mjög viðkvæmt fyrir því sem maður segir. Ég get verið svo kjaftfor. Þarf að hafa hemil á mér. Eftir einn þátt um daginn hringdi mamma í mig og sagði: "Elma Dögg, annaðhvort hættirðu í þessum þáttum eða bindur hnút á tunguna á þér." Ég svaraði henni bara að þetta væri minn þáttur en ekki hennar." Er stimpluð ljóska Eitt umtalað atvik var um daginn þegar spurt var í hraðaspurningum hver forsætisráðherra Íslands væri. Það hlakkaði í áhorfendum þegar Elma og liðsfélagi hennar svöruðu engu en Máni og félagi hans nefndu Ólaf Ragnar Grímsson. "Það er pressa á manni þarna. En þótt þeir hafi svarað vitlaust, sama hvort þeir misheyrðu spurninguna eða ekki, þá er ég stimpluð ljóskan ..." Afganginn af viðtalinu, djammkortið og margt fleira er að finna í Fókus sem fylgir DV í dag.