Minnka áhættu á vímuefnafíkn

Hægt er að draga úr áhættu á vímuefnafíkn og afbrotahneigð til muna með því að meðhöndla væga ofvirkni og athyglisbrest þegar í barnæsku. Stefán J. Hreiðarsson, barnalæknir á Greiningarstöð ríkisins, segir umræðuna um geðraskanir barna á villigötum. Um mikilvægt forvarnarstarf sé að ræða. Börnum sem greinast með geðraskanir hefur fjölgað til muna á síðustu árum og íslensk börn eiga norðurlandamet í notkun geðlyfja. Þetta er eitt stærsta vandamál sem skólarnir standa frammi fyrir í dag. Stefán segir nauðsynlegt að hafa í huga að þetta sé mjög breiður hópur og sem betur fer glími stór hluti þessara barna ekki við alvarleg geðræn vandamál. Það hafi hins vegar mikið forvarnargildi að hjálpa þeim. Umræðan megi því ekki verða of upphrópunarkennd. Stefán segir að hægt sé að koma í veg fyrir alvarleg vandamál seinna með lyfjum, sérkennslu, atferlismeðferð og hegðunarráðgjöf til foreldra. Hann kveðst líta það jákvæðum augum að það skuli vera fjölgun í þeim hópi sem fær hjálp vegna þessa vanda. Með alvarlegum vandamálum á Stefán m.a. við vímuefnafíkn og afbrotahneigð. Stefáni finnst ekki áhyggjuefni að íslensk börn noti meira af geðlyfjum en börn hjá nágrannaþjóðunum. Samkvæmt bestu þekkingu í dag sé lyfjameðferð veigamikill þáttur í að hjálpa þessum börnum og vernda þau fyrir neikvæðu áreiti. Dæmi eru um að börn allt niður í eins árs aldur fái geðlyf en að sögn Stefáns er ástæðan fyrir því fyrst og fremst sú að gera foreldrum kleift að ráða við ákveðna hegðun og beita sínum hegðunarmótandi aðgerðum.