Fá fullt nafn skráð í þjóðskrá

Innan skamms geta allir Íslendingar verið skráðir fullu nafni í þjóðskrá, sama hversu löng nöfn þeirra eru. Í skjalasafni Hagstofu Íslands er að finna fæðingar- og dánardægur Íslendinga. Í millitíðinni eru nöfnin skráð í Þjóðskrá. Sú skrá hefur verið á tölvutæku formi frá árinu 1985 en þrátt fyrir að tölvukerfið hafi verið uppfært árið 2000 er það enn svo að það býður einungis upp á þrjátíu og eitt stafabil. Þeir sem heita lengri nöfnum fá aðeins hluta nafn síns skráð eða millinöfn falla einfaldlega út. Ástæða þessa er meðal annars sú að nöfnin eiga að geta passað inn á gluggaumslög. Þingmaðurinn Katrín Júlíusdóttur innti ráðherra Hagstofu Íslands eftir því á Alþingi í dag hvort til stæði að breyta þessu. Þingmanninum finnst gluggaumslög léttvæg rök eftir að hafa mælt slík umslög og kannað og segir að samkvæmt því sé hægt að hækka stafabilið 45-60 stafabil. Og frekari eftirgrennslan þingmannsins leiddi í ljós að þetta snertir þúsundir Íslendinga. Til að mynda fái 11,4% þeirra kvenna sem heita Sigríður að fyrra nafni ekki fullt nafn sitt skráð. Davíð Oddsson, ráðherra Hagstofu Íslands, upplýsti að Hagstofan vinni um þessar mundir að breytingum á tölvukerfinu. Þær séu ekki meiriháttar mál, hvorki dýrt né flókið. Þeir sem vilji styttri útgáfu á póstlistum sem Þjóðskráin gefi út verði einnig gert til hæfis. Þær fjögur þúsund Sigríðar sem nú eru skráðar í Þjóðskrá ættu því allar að verða skráðar þar undir fullu nafni innan skamms.