Níu báta fækkun á tveimur árum

Sú var tíðin að útgerð og fiskverkun var blómleg á Stöðvarfirði. Nú er aðeins ein lítil fiskverkun eftir; Skútuklöpp í eigu þeirra Guðna Brynjars Ársælssonar, Páls Óskarssonar, Grétars Arnþórssonar og útgerðarinnar Lukku ehf. Skútuklöpp er fimm ára gamalt fyrirtæki, saltaði lengst af fisk og stundar tilraunaeldi á þorski. Nú er saltfiskverkunin að mestu fyrir bí, vegna gengismála.

"Það er ekkert upp úr þessari verkun að hafa lengur," segir Páll Óskarsson og dæsir. Nú snýst þetta að mestu um þjónustu við báta og fiskmarkað; tveir bátar leggja upp hjá Skútuklöpp eins og er og fiska alveg þokkalega. Það kynduga við þennan rekstur er að eigendurnir búa allir á Fáskrúð­s­firði og aka daglega þessa 25 kílómetra sem eru milli byggðarlaganna.

"Þegar við byrjuðum árið 2000 á Fáskrúðsfirði kom eiginlega allur fiskurinn héðan," útskýrir Páll og hlær, "og þegar Stöðvarfjörður fékk úthlutað byggðakvóta 2001 fluttum við alla vinnsluna hingað." Síðan hefur reksturinn heldur dregist saman og þeir þurft að fækka fólki; eru sjö í kringum þetta núna en voru tíu þegar best lét. Og sem dæmi um þann samdrátt í sjávarútvegi sem staður eins og Stöðvarfjörður hefur mátt horfa upp á, nefnir Páll að fyrir tveimur árum lögðu ellefu bátar upp á staðnum en eru nú bara tveir eins og áður er getið. Hann er þó ekkert að berja sér; er bjartsýnn á að Skútuklöpp haldi velli. "Þetta rekur sig," segir hann og hlær góðlátlega.