Krefjast lögbanns á ráðningu

Skjár einn krafðist á föstudag hjá Sýslumanninum í Reykjavík lögbanns á ráðningu Helga Steinars Hermannssonar, fyrrverandi dagskrárstjóra Skjás eins, til 365 ljósvakamiðla. Magnús Ragnarsson, sjónvarpsstjóri Skjás eins, segir trúnað hafa verið brotinn við félagið. Samkvæmt ráðningarsamningi segir hann Helga ekki mega starfa í samkeppnisrekstri í heilt ár eftir starfslok. "Ekki nema að það sé erlendis. Svo var líka í samningnum trúnaðarákvæði, en því miður voru viðskiptaáætlanir félagsins sendar út úr húsi," sagði hann, en með lögbannsbeiðninni voru lagðir fram 15 tölvupóstar Helga til Árna Þórs Vigfússonar, fyrrum sjónvarpsstjóra Skjás eins. "Þeir voru svo ráðnir saman upp á 365." Helgi vísar á bug ásökunum um trúnaðarbrest eða samningsrof og telur í raun á sér brotið með því að hnýst hafi verið tölvupóst hans. "Í 56 þúsund póstum er auðvitað eitthvað sem hægt er að rífa úr samhengi, en þarna er ekkert í gangi sem ekki átti að vera." Eins segir hann ákvæði í ráðningarsamningi hans heimila störf við ráðgjöf og erlend þróunarstörf og það sé til slíkra starfa sem hann hafi ráðið sig. Þá segir Helgi starfslok sína hafa borið að með allt öðrum hætti en sjónvarpsstjóri Skjás eins hefur lýst í fjölmiðlum. "Ég sagði upp sjálfur upp 4. apríl og því kolrangt að Magnús hafi sagt mér upp 9. apríl," segir hann og telur Magnús hafa farið offari í reiðikasti heima hjá honum að kvöldi laugardagsins 9. apríl. Fyrr um daginn segist hann hafa gengið af fundi sem Magnús hafði boðað hann á eftir að Magnús missti stjórn á skapi sínu. "Hann elti mig hins vegar heim og hótaði konu minni. Svo sat hann um húsið í 40 mínútur eftir að hafa látið öllum illum látum," sagði Helgi og fjölda fólks mundu geta staðfest atburðarrásina, þar á meðal stjórnarformann Skjás eins, sem persónulega hafi beðið hann afsökunar á uppákomunni. Ekki náðist aftur í Magnús í gær til að bera undir hann þessar ávirðingar.