Enn talsverð mannekla á leikskólum og tómstundaheimilum

Enn vantar starfsfólk í tæp 135 stöðugildi hjá Leikskólum Reykjavíkur og frístundaheimilum borgarinnar, en erfitt hefur reynst að manna þær í sumar og haust vegna þenslu á vinnumarkaði. Ástandið virðist þó vera að skána og umsóknum um störfin fer fjölgandi.

Starfólk vantar í tæp 68 stöðugildi á leikskólum borgarinnar. Mestur er skoturinn í Breiðholti þar sem vantar í 14 stöðugildi og í Vesturbæ Reykjavíkur þar sem vantar í þrettán og hálft. Skást er ástandið í Fossvogi og Háteigshverfi en þar vantar starfsfólk í tæp sjö stöðugildi. Frá 20. október, þegar starfsmannaekla var síðast könnuð, hefur tekist að ráða í fimm stöðugildi. Bíða nú 58 eftir leikskólaplássi á móti 71 við síðustu könnun. Þá hafa nokkrir leikskólanna sem styttu opnunartíma sinn vegna manneklu hætt því þar sem þeim hefur tekist að ráða starfsfólk.

Enn vantar 67 starfsmenn á frístundaheimili borgarinnar en vonast er til að átandið fari að batna. Að sögn Sigrúnar Sveinbjörnsdóttur, verkefnisstjóra hjá Íþrótta- og tómstundaráði, er ástandið verst í Breiðholti en þar vantar átján starfsmenn. Þá segir hún að í Grafarvogi séu heimilin undirmönnuð. Það helgast af því að börn hafa verið tekin inn eftir að starfsmönnum hefur fjölgað á heimilunum en svo hefur þeim aftur fækkað og þá telur ÍTR að ekki sé stætt á því að vísa börnunum frá vegna þess. Sigrún segir þennan vanda hafa komið upp víðar í borginni en þó ekki í eins miklum mæli.

Aðspurð segist Sigrún bjartsýn að úr rætist enda hafi umsóknum um störf fjölgað nokkuð að undanförnu miðað við það sem var fyrr í haust. Hún segir aldrei hafa verið eins mikið af góðu fólki við störf á frístundaheimilunum og þeim fjölgi stöðugt sem hafi menntað sig fyrir störfin, en tómstundafræði eru bæði kennd í Kennaraháskólanum og Háskóla Íslands. Unnið sé að því að reyna að koma þeim sem lokið hafi dimplómanámi í faginu upp um launaflokka svo auðveldara verði að manna þær stöður sem lausar eru.