Ríta gengin á land

Fellibylurinn Ríta gekk á land í Texas og Louisiana klukkan hálfátta í morgun að íslenskum tíma. Auga fellibylsins skall á suðvesturströnd Louisiana, rétt austan við borgina Sabine Pass í Texas. Vindhraðinn er tæpir tvö hundruð kílómetrar á klukkustund. Ríta hefur þegar farið yfir Galveston og þar eru nokkrar byggingar í ljósum logum en nær allir íbúar voru flúnir. Eins rofnuðu flóðvarnargarðar í New Orleans og vatn flæddi um nýþurrkaðar götur, þrátt fyrir að augað kæmi á land um 320 kílómetrum vestan við borgina. Fellibylurinn sveigði lítillega til austurs miðað við fyrri spár sem þýðir að Houston mun líklega sleppa mun betur en ráð var fyrir gert. Um tvær milljónir manna hafa flúið borgina undanfarna daga. Þar er klukkan fimm að morgni og þar er Ingólfur Bjarni Sigfússon, fréttamaður Stöðvar 2 og Bylgjunnar. Hann segir að það sé slagviðri í borginni þessa stundina. Ríta hafi farið niður í styrkleika 3 nánast um leið og hún kom að landi. Engar fréttir hafa borist af mannskaða en einhver tré hafa rifnað upp og lent á bílum og húsum. Um hálf til ein milljón manna er rafmagnslaus. Ingólfur segir að sérfræðingar tali um að það geti verið að Ríta stoppi þegar hún verði komin norður fyrir Houston og snúi þá aftur og valdi því einhverjum usla fram eftir næstu viku.