Versta nóttin hingað til

Ekkert lát er á óeirðunum í Frakklandi. Þrettán hundruð bílar voru brenndir og kveikt var í skólum, verslunum, lögreglustöðvum og pósthúsum í nótt. Þetta er versta nótt óeirðanna til þessa, hin tíunda í röð.

Þrátt fyrir mótmælagöngur íbúanna í hverfunum sem verst hafa orðið úti, þar sem þeir biðja um samræður við stjórnvöld og að óeirðaseggir láti af þessari hegðan, varð ástandið bara verra í gærkvöldi og í nótt. Lögregla handtók á fjórða hundrað brennuvarga, lögregluþyrlur sveimuðu yfir úthverfum Parísar og slökkvilið og lögregla þeystist borgarenda á milli til að handtaka mótmælendur og slökkva elda. Þetta átti reyndar ekki bara við um París, því fregnir hafa borist af viðlíka látum frá Strassburg, Tulouse og Nantes. Mótmælendur eru einnig farnir að færa sig nær miðborg Parísar og var til dæmis kveikt í fjórum bílum á Place de la Republique í miðborginni og fleirum í sautjánda hverfi. Verst var ástandið þó í Evreux í Normandí, um eitt hundrað kílómetra vestur af París. Þar var kveikt í tugum bíla, apóteki og verslunarmiðstöð og slösuðust að minnsta kosti átta manns þegar þeim lenti saman við brennuvargana. Staðreyndin er auðvitað sú að það eru þeir innflytjendur sem náð hafa að koma undir sig fótunum og eiga bíla og reka verslanir í hverfunum sem tapa mest á óeirðunum, því það eru þeirra eigur sem verið er að brenna. Leiðtogi múslima í París, Dalil Boubakeur, hefur kallað eftir sáttatóni frá stjórnvöldum, annars verði ekki séð fyrir endann á ólátunum.

Nicolas Sarkozy, innanríkisráðherra heitir hins vegar þungum dómum yfir forsprökkum óeirðanna og segir að svona skrílsháttur verði ekki liðinn, hvað sem menn segja. Þegar ró verði komin á og glæpamenn dregnir fyrir dóm, fyrst þá verði hægt að fara að ræða um umbætur í hverfum innflytjenda og einhvers konar sáttagjörð við þennan hóp sem virðist vissulega hafi orðið útundan í kerfinu. Flestir brennuvarganna eru ungir menn af norður-afrískum uppruna, atvinnu-, menntunar-, og greinilega heldur vonlausir um framtíðina.