Meginmarkmiðið að eyða launamun

Árni Magnússon segir það meginmarkmið sitt sem jafnréttisráðherra að eyða launamun kynjanna þó engin tímamörk hafi verið sett. Á annað þúsund Íslendingar komu saman á Þingvöllum í dag til að fagna 90 ára kosningarétti kvenna en þó margt hafi áunnist í baráttunni voru menn sammála um að henni sé langt í frá lokið. Árni skorar á fyrirtæki og stofnanir í landinu að skoða hvers vegna kynbundinn launamunur sé fyrir hendi og hvetur til launajafnréttis; það að konum sé mismunað sé óþolandi. Þetta kom fram í ræðu hans á Þingvöllum í dag. Íslendingar skunduðu á Þingvöll í dag og fögnuðu og þó nokkuð dimmt hafi verið yfir stöðvaði það konur ekki, enda þær eflaust séð það miklu verra. Farið var niður Almannagjá og að Drekkingarhyl þar sem átján rósir voru settar í minningu þeirra átján kvenna sem þar var drekkt á sínum tíma. Þorgerður Katrín Gunnarsdóttir menntamálaráðherra segir gríðarlegan árangur hafa náðst í jafnréttismálum á síðustu árum þó merki í samfélaginu gefi til kynna að nokkuð sé í land, t.a.m. varðandi launamuninn og hversu fáar konur séu í stjórnum fyrirtækja. Hún segist skynja að samfélagið sé að breytast, m.a. með tilkomu breytts fæðingarorlofs sem komið var á á sínum tíma. Mikil dagskrá var á Þingvöllum í dag en meðal þess sem boðið var upp á var kórsöngur og ljóðalestur. Þá dönsuðu valkyrjur og álfameyjar undir stjórn Auðar Bjarnadóttur og frú Vigdís Finnbogadóttir, fyrrverandi forseti lýðveldisins, hélt hátíðarávarp þar sem hún hvatti karlmenn til að taka meira tillit til kvenna. Hún sagði að vinátta og virðing kynjanna sé það eina sem geti leitt til fullra mannréttinda. „Lýðræði sem útilokar völd kvenna er ekki fullþroska lýðræði. Konur þurfa að stíga markvist fram í sviðsljósið og karlar verða að ganga til móts við þær,“ sagði Vigdís í ávarpi sínu.  Þá var gerð Þingvallafundar lesin upp og afhent Árna Magnússyni jafnréttisráðherra eins og hann var titilaður í dagskrá „Baráttuhátíðar kvenna 2005“. Helsta markmið Árna sem jafnréttismálaráðherra er að eyða launamun kynjanna. Hann segir miklum árangri hafa verið náð á undanförnum árum og áratugum en það þurfi heldur betur að berjast áfram. Hátíðinni lýkur í kvöld þegar kvennamessa verður haldin í Laugardal en hún hefst nú klukkan hálf níu  Séra Auður Eir Vilhjálmsdóttir mun predika og kór Kvennakirkjunnar leiðir söng undir stjórn Aðalheiðar Þorsteinsdóttur.