Íbúðalánasjóður selur fjölda eigna

Íbúðalánasjóður hefur selt 43 íbúðir það sem af er ári og hefur aldrei átt jafn fáar íbúðir. Í upphafi árs átti sjóðurinn 107 íbúðir en oftlega hefur fjöldi þeirra legið á bilinu 100-120. Íbúðalánasjóður eignast íbúðir þegar viðskiptavinir hans geta ekki staðið skil á afborgunum lána um nokkra hríð og er það þrautalending hans að leysa til sín fasteignirnar þar sem veð fyrir lánunum hvíla. Guðmundur Bjarnason, framkvæmdastjóri Íbúðalánasjóðs, rekur ástæður þessarar ágætu sölu sjóðsins á eigin íbúðum til betra ástands í þjóðfélaginu og almennrar bjartsýni. "Það er greinilegt að talsverð viðhorfsbreyting hefur orðið í þjóðfélaginu. Atvinnulífið hefur víða eflst og væntingar eru miklar." Ljóst er að eitthvað hefur selst út á væntingarnar einar saman og nefndir Guðmundur sem dæmi að fyrir fáum mánuðum átti Íbúðalánasjóður níu íbúðir á Siglufirði en þær eru allar seldar. "Ég sé ekki aðra ástæðu fyrir þessari góðu sölu á Siglufirði en þá að til stendur að grafa jarðgöng milli Siglufjarðar og Ólafsfjarðar." Að auki nefnir Guðmundur að höfuðborgarsvæðið hafi í raun teygt sig út um Vestur- og Suðurland og því hafi fylgt aukin spurn eftir húsnæði í þéttbýlinu í þessum héruðum. Athygli vekur að allar átján íbúðir Íbúðalánasjóðs á Suðurlandi eru í Vestmannaeyjum. Má af því ráða að ekki gæti þar sömu bjartsýni í efnahagsmálum og víðast hvar á landinu. Guðmundur bendir þó á að fyrir nokkru hafi íbúðirnar í Eyjum verið 27 en eftir söluátak sem ráðist var í seldust níu þeirra. Að sögn Guðmundar hefur Íbúðalánasjóður fært verð íbúða sinna til þess sem telja má söluvænlegt en þó gætt sín á að lækka ekki verðið um of. Slíkt geti enda skaðað bæði sjóðinn og aðra fasteignaeigendur sem hyggjast selja eignir sínar.