Spilar jólalög í kántrísveiflu

Kántrísveit Baggalúts efnir til útgáfutónleika á Nasa í kvöld vegna plötunnar Pabbi þarf að vinna. Á tónleikunum mun sveitin spila kraumandi sveitatónlist með þjóðlegu aðventuívafi. Tónleikarnir hefjast klukkan rúmlega 22.00. Sérstakur leynigestur verður Rúnar Júlíusson.

"Við ætlum að reyna að jóla þetta aðeins upp, verðum með sleðabjöllur og svona," segir Baggalúturinn Bragi Valdimar Skúlason. "Við ætlum að taka þessi jólalög líka í kántrísveiflu." Baggalútur sendi nýverið frá sér aðventulagið Sagan af Jesúsi sem má nálgast á heimasíðu Baggalúts. "Við fengum lánaðan gamlan þýskan smell og settum smá flórsykur á hann," segir Bragi um aðventulagið.

"Við vorum með Dolly og Kenny í fyrra og það var upphafið af kántríbylgjunni." Jólalag Baggalúts 2005, Föndurstund, er einnig nýkomið inn á heimasíðuna en þar er fengið að láni frægt lag rokksveitarinnar AC/DC. Tónleikarnir í kvöld verða þeir einu hjá Baggalút á þessu ári. "Það verður bara þetta og svo förum við í jólafrí. Svo verður eitthvað sprellað á næsta ári. Við finnum okkur einhverja aðra tónlistarstefnu, við erum búnir að klára þennan brandara. Við sjáum til hvað setur," segir Bragi.