Gríðarlega svekkjandi

Íslenski hópurinn sem tók þátt í forkeppni Evróvisjón-söngvakeppninnar í Kænugarði í Úkraínu í gær er gríðarlega svekktur með að hafa ekki komist í aðalkeppnina sem verður annað kvöld. „Við trúðum vart eigin augum og eyrum,“ segir fararstjóri hópsins.  Þátttöku Íslendinga í söngvakeppni evrópskra sjónvarsstöðva í ár er lokið. Íslenska lagið, „If I Had Your Love“ sem Selma Björnsdóttir söng, hlaut ekki náð fyrir augum áhorfenda þegar forkeppnin fór fram í Kænugarði í gærkvöldi. Tíu lög komust áfram úr forkeppninni í aðalkeppnina, sem verður annað kvöld, en íslenska lagið varð ekki eitt af þeim. Tæknibilun olli því að fimm eða sex lög voru með brenglað hljóð í útsendingu til nokkurra Evrópulanda, þar á meðal norska lagið, en þrátt fyrir bilunina komst það í aðalkeppnina. Ekki náðist í Selmu fyrir hádegisfréttir þar sem hún var enn sofandi og að jafna sig eftir gærkvöldið. Jónatan Garðarsson, fararstjóri íslenska hópsins, segir að frammistaða hennar og annarra í hópnum hafi verið góð eins og við hafi verið að búast. Hann segir hópinn vart hafa trúað eigin augum og eyrum en þó hafa verið búinn að undirbúa sig fyrir að svona færi. Það sem sérfræðingar spái fyrir keppnina sé nefnilega ekki endilega í samræmi við það sem almenningur kýs. „En því verður ekki neitað að við erum svekkt yfir þessu og hefðum gjarnan viljað halda áfram,“ segir Jónatan. Hann segir að þrátt fyrir vonbrigðin hafi hópurinn þó tekið úrslitunum vel en flestir hafi þó viljað fara frá Kænugarði til Kaupmannahafnar í dag. Hið árlega Evróvisjón-partý Páls Óskars verður haldið á skemmtistaðnum Nasa við Austurvöll annað kvöld. Páll Óskar segir að stemningin verði örugglega góð þrátt fyrir úrslit gærkvöldsins og að hann, og eflaust fleiri, hefðu hlakkað meira til að sjá Icy-hópinn frekar en að sjá sjálfa Evróvisjón-keppnina. Icy-hópurinn kemur fram á Nasa í fyrsta skipti í 19 ár eða frá því árið 1986 þegar þau Helga Möller, Pálmi Gunnarsson og Eiríkur Hauksson sungu „Gleðibankann“ þegar Ísland var með í Evróvisjón í fyrsta skipti.