Létust í vinnuslysi í Svíþjóð

Að minnsta kosti tveir menn létu lífið þegar þak hrundi á byggingarsvæði í Helsingborg í Suður-Svíþjóð í morgun. Sænska lögreglan óttast að fleiri kunni að hafa farist í slysinu sem varð á byggingasvæði í norðurhluta Helsingborgar. Minnst tveir menn slösuðust alvarlega. Fjöldi iðnaðarmanna var við störf á svæðinu þegar um hundrað fermetra þak á vöruhúsi hrundi en ekki er enn ljóst hvort einhverjir séu grafnir undir brakinu. Fjölmennt björgunarlið er á staðnum til að leita að mönnum í brakinu og er meðal annars notast við sérstaka leitarhunda. Aðstæður til björgunar á byggingasvæðinu eru erfiðar og hefur stórt svæði verið girt af þar sem óttast er að aðrir hlutar hússins geti hrunið. Ekki er vitað hvað olli slysinu, en verið er að yfirheyra starfsmenn á svæðinu.