Er herinn að fara?

Hvaða skilaboð fólust í orðum forsætisráðherra um varnarsamstarfið fyrir helgi? Er verið að búa þjóðina undir að samningar um varnir landsins takist ekki? Formaður Samfylkingarinnar vildi fá svör við þessum spurningum á Alþingi í dag.

Ingibjörg Sólrún Gísladóttir, formaður Samfylkingarinnar, kvaddi sér hljóðs til að ræða varnarmálin á Alþingi í dag og voru það orð forsætisráðherra á fundi Framsóknarflokksins fyrir helgi sem voru henni hugleikin. Ingibjörg vitnaði í orð forsætisráðherra um að Bandaríkjaher mætti fara ef hann vildi. Ingibjörg sagði málið snúast um það hvort að Íslendingar teldu þörf fyrir að herinn væri hér á landi en ekki um það hvort Bandaríkjamenn vildu vera hér á landi. Hún spurði hvort að með þessu væri verið að búa þjóðina undir að samningar vegna veru varnarliðsins myndu ekki ganga upp eða voru skilaboðin þau að niðurstaða þessara samninga muni verða á skjön við samningsmarkmið ríkisstjórnarinnar vegna þess að samningsmarkmið ríkisstjórnarinnar var að hér ættu að vera fjórar orrustuþotur á landinu, það væri lágmarks viðbúnaðurinn.

Halldór Ásgrímsson, forsætisráðherra sagði að það væri skoðun ríkisstjórnarinnar að hér þurfi að vera sýnilegar varnir og það hefði hann ítreka á umræddum fundi. Hann sagði að hann hefði jafnframt verið að lýsa yfir óánægju með það hversu hægt þetta gengi og hann teldi að þeir aðilar í Bandaríkjunum sem að telja ekki nauðsynlegt að hafa þær varnir sem hér eru núna, hafi verið all áhrifamiklir í þessu máli.

Geir H. Haarde, utanríkisráðherra, sagði að menn gerðu sér áfram vonir um það að það verði hægt að koma þessum málum í farveg sem er viðunandi fyrir báða aðila.

Steingrímur J. Sigfússon, formaður Vinstri-grænna, sagði að í fyrsta lagi hefði nú hæstvirtur ráðherra væntanlega ekki þurft að taka þetta fram nema vegna þess að einmitt þetta sem að hann er að reyna að þvo af sér og ríkisstjórn sinni, hafa menn verið að reyna. Það er að segja að reyna að fá herinn til að vera hér þó hann vilji ekki vera hér. Annars hefði maðurinn ekki þurft að taka þetta fram. Liggur það ekki í augum uppi? Og hið síðara bendir auðvitað til mikillar gremju, ef ekki uppgjafar, af hálfu ríkisstjórnarinnar og það er athyglisvert ef svo er komið að hæstvirtur forsætisráðherra metur stöðuna meira og minna tapaða. Það er forneskja. Það er úrelt og það er fáránlegt að reyna að ríghalda hér í fullkomlega óþörf og ástæðulaus hernaðarumsvif upp á Íslandi sagði Steingrímur.

Talsmenn bandarískra stjórnvalda höfðu ekkert um orð forsætisráðherra að segja í dag en ítrekuðu einfaldlega það sem þeir hafa ávallt sagt: Bandaríkjastjórn ætlast til þess að Íslendingar greiði eitthvað fyrir varnir landsins rétt eins og aðrir.