Valur mætir Potsdam í dag

Valsstúlkur mæta í dag þýska liðinu Potsdam í átta liða úrslitum Evrópukeppninnar í knattspyrnu en leikurinn fer fram Laugardalsvelli. Ljóst er að lið Vals þarf að eiga góðan leik til þess að leggja þýska liðið að velli þar sem það er án efa eitt það sterkasta í Evrópu um þessar mundir. Valsstúlkan Margrét Lára Viðarsdóttir er þó ekki í vafa um að Valur geti lagt þýska liðið að velli. "Það er ljóst að þetta er hörkulið. Við höfum ekki verið að velta okkur of mikið upp úr því hversu gott þetta lið er. Fyrst og fremst verðum við að trúa því að við getum unnið þennan leik ef við leggjum okkur fram. Þannig að við erum fullar bjartsýni og ætlum að standa okkur vel í þessum viðureignum." Valsstúlkur hafa farið svolítið óvenjulega leið til þess að auglýsa leikinn en þær létu mynda sig á nærfötunum einum klæða og hafa auglýsingar með þessum myndum vakið verðskuldaða athygli. "Við gerðum þetta nú fyrst og fremst til þess að auka samheldnina í hópnum og svo auðvitað líka til þess að reyna að fá áhorfendur á völlinn. En alltaf þegar svona auglýsingar koma fram eru einhverjir sem telja þær óviðeigandi og ósmekklegar. Við erum ekki að hugsa um neitt annað en að fá fólk á völlinn og vonandi lætur það sjá sig því við þurfum virkilega á stuðningi þess að halda í leiknum," sagði Margrét Lára. Leikurinn hefst klukkan 14.00 en seinni leikurinn fer fram í Þýskalandi viku síðar.