Clint heiðraður í bak og fyrir

Clint Eastwood ætti ekki að fara varhluta af heiðursverðlaunum á næstunni. Samtök kvikmyndaleikstjóra (DGA) ætla að afhenda honum viðurkenningu fyrir framlag sitt til kvikmyndagerðar og samtök framleiðanda (PGA) ætla að heiðra hann með sams konar hætti. Athafnirnar fara fram með sex daga millibili í byrjun næsta árs.

Eastwood er án vafa einn valdamesti maður kvikmyndaiðnaðarins í Bandaríkjunum. Eftir að hafa barist við óféti í spaghettívestrunum og gómað glæpamenn sem Dirty Harry sneri Eastwood sér í auknum mæli að leikstjórn og hefur fáum leikurum tekist jafn vel upp. Hann hefur leikstýrt myndum á borð við Play Misty for Me og Bird þar sem Forest Whitaker fór hamförum í hlutverki saxófónleikarans Charlie Parker. Sennilega er vestrahetjan þekktust fyrir að hafa tvívegis staðið uppi sem sigurvegari á Óskarsverðlaununum. Í fyrra skiptið malaði vestrinn Unforgiven keppinauta sína árið 1993 og í fyrra fékk mynd hans Million Dollar Baby fjórar styttur, þar á meðal sem besta myndin.