Barrmikil, fögur jólatré í skógum lands

Ómissandi hluti af jólaskapi æ fleiri Íslendinga er að fara í rómantískan desemberbíltúr með bitgóða sög og dýrindis nesti í þeim tilgangi að velja og höggva sín eigin jólatré. Að sögn Brynjólfs Jónssonar, skógfræðings og framkvæmdastjóra Skógræktarfélags Íslands, hafa mörg aðildarfélög Skógræktarfélagsins boðið upp á þennan möguleika um árabil, en um land allt eru sérstakir jólaskógar ræktaðir með forkunnar fögrum grenitrjám og stafafuru sem prýða mega stofur landsmanna.

"Með hverju árinu sem líður verður ferð í jólaskógana veigameiri og útbreiddari þáttur í jólahaldi þjóðarinnar. Barnafjölskyldur eru mest áberandi í hópi skógarhöggsmanna og fara þá mikið í skógana í kringum Reykjavík og nágrannasveitarfélögin, en einnig er tekið sérstaklega á móti stærri hópum í Brynjudalsskógi í Hvalfirði. Þá myndast oft mikil jólastemming meðal manna, kveiktur er varðeldur, góðgæti lagt á borð og oftar en ekki teknir með jólasveinar til að gera sem mest úr deginum fyrir börnin, sem skemmta sér vitanlega best við leitina að rétta jólatrénu," segir Brynjólfur, en starfsmenn skógræktarfélaganna taka á mót gestum jólaskóganna á ákveðnum tímum allar helgar í desember.

"Það er allur gangur á því hvaða stærð jólatrés verður fyrir valinu og fer eftir smekk hvers og eins; en getur verið frá einum metra og upp í þrjá, fjóra. Jólatrén eru nú geysilega falleg og barrmikil eftir liðið sumar og öruggt að enginn verður svikinn af skógarhöggsferð í jólaskóginn til að finna hið fullkomna jólatré fjölskyldunnar. Á staðnum pakka starfsmenn skógræktarfélaganna inn trjánum í net og ganga frá til flutnings, en fyrir hvert tré borga gestir viðráðanlegt verð sem fer eftir stærð trjánna," segir Brynjólfur og bætir við að óhætt sé að höggva sér tré strax í byrjun desember.

"Jólatréð er lifandi og fara þarf vel með það svo það standi sem lengst. Mikilvægast er að geyma það utandyra, standandi í vatni. Þá gildir einu hvort frjósi eða ekki, en trén halda barri sínu og fegurð áfram þótt enn séu nokkuð margir dagar til jóla."

Um opnunartíma og staðsetningu jólaskóganna má lesa á heimasíðu Skógræktarfélags Íslands: skog.is