Simon Cowell stýrir framtíðinni

Þegar um það bil mánuður er í að fimmta tímabil American Idol byrji eru sögusagnir í gangi um að hinn miður geðþekki dómari, Simon Cowell, verði ekki með þegar þættirnir hefjast að nýju. Samkvæmt dagblaðinu New York Times er samningaviðræðum við Cowell enn ekki lokið og hafa framleiðendur þáttanna áhyggjur af því að Simon muni þráast við að semja.

Cowell er víst í mjög góðri samningsaðstöðu þar sem hann er í þann mund að koma af stað bandarískri útgáfu af þættinum X-Factor, sem slegið hefur í gegn í Bretlandi.

Fox-sjónvarpsstöðin, sem framleiðir þættina American Idol vill endilega fá X-Factor á sína stöð en það mun ekki gerast nema Cowell fái umtalsverða launahækkun fyrir hlutverk sitt í American Idol. Hann fær nú þegar um 8 milljónir dollara á ári fyrir að koma fram í þáttunum.

Samkvæmt heimildamanni sem vinnur við þættina er öllum ljóst að ef Cowell hættir í þáttunum verður erfitt að fylla skarð hans. "Við vitum öll að ef Simon hættir eru góðar líkur á að þátturinn hætti einnig. Við erum samt sem áður vongóð um að hann semji við okkur að lokum."

Að sögn er andrúmsloftið rafmagnað á milli Simons og allra annarra á tökustað þáttanna. Þrátt fyrir það segir einn dómaranna, Randy Jackson, að næsta tímabil verði frábært. "Þetta verður frábært ár að mínu mati. Við eigum margt frábært hæfileikafólk sem bíður eftir því að láta ljós sitt skína."