Myrtir verði Talibönum ekki sleppt

Hópur afganskra öfgamanna, sem segist halda þrem starfsmönnum Sameinuðu þjóðanna í gíslingu, segja að þeir séu heilir á húfi, en verði myrtir ef öllum Talibönum sem sitja í fangelsi, verði ekki sleppt. Mannræningjarnir kalla sig Her múslima, og þeir gáfu fréttamanni Reuter fréttastofunnar upp númer sem þeir sögðu vera af starfsmannakortum tveggja gíslanna. Talsmaður ræningjanna sagði í símtali við fréttamann Reuters að þeir vildu fá alla Talibana lausa úr fangelsum, bæði í Afganistan og í fangabúðum Bandaríkjamanna á Kúbu. Ellegar yrðu gíslarnir myrtir.