Douglas vill ekki fleiri börn

Kvikmyndaleikarinn Michael Douglas hefur gert út um allar vonir hinnar ungu eiginkonu sinnar Catherine Zeta Jones um fleiri börn ef marka má fréttir Daily Star. Douglas er orðinn 59 ára en Zeta Jones er aðeins 34 ára. Saman eiga þau tvö börn; soninn Dylan sem er þriggja ára og dótturina Carys sem er eins árs. Catherine hafði víst fullan hug á að bæta enn frekar í barnahópinn en Michael gamli sagði hingað og ekki lengra. Michael á einnig 25 ára son, Cameron, frá fyrra hjónabandi, og sér sennilega enga ástæðu til að fjölga erfingjunum, enda kominn af léttasta skeiði hvað varðar næturgrát og bleyjuskiptingar. Annars er allt gott að frétta af skötuhjúunum sem eyða mestum tíma sínum í Bandaríkjunum þar sem Catherine segir að þar finni hún sitt rétta umhverfi þó hún sé fædd og uppalin í Wales. Hjónin eru þó að láta reisa sér fokdýra villu í Mumbles sem er sjávarþorp í grennd við Swansea þar sem leikkonan ólst upp.