Mamma þvingar Britney í hjónaband

Slúðurblöðin í Bandaríkjunum fullyrða að óvænt tilkynning Britney Spears um að hún hafi trúlofast Kevin Federline sé tilkomin vegna þess að stúlkan sé með barni. News of the World segist hafa heimildir fyrir því að stúlkan eigi von á sér um jólin og móðir hennar vilji þess vegna að hún verði gengin í hjónaband í nóvember þar sem hún taki það ekki í mál að barnabarnið fæðist í synd. Heimildarmaður úr innsta hring söngkonunnar segir að mamman hafi tekið stjórnina. "Hún er búin að leyfa Britney að gera það sem henni sýnist en nú vill hún að allt sé gert samkvæmt reglunum. Þess vegna trúlofuðu þau sig fyrst frekar en að gifta sig strax eins og Britney gerði áður." Leiði trúlofunin til giftingar verður þetta annað hjónaband söngkonunnar ungu en hún var gift æskufélaga sínum, Jason Alexander, í 55 klukkustundir í janúar.