Mikið um slys og óhöpp

Mikið var um slys og óhöpp í umferðinni í gærkvöldi en enginn slasaðist alvarlega þótt stundum hafi staðið tæpt. Sex manns voru fluttir á slysadeild Landspítalans eftir tvö umferðarslys í gærkvöldi. Þrír voru fluttir þangað eftir að bíll sem þeir voru í valt á Skeiða- og Hrunamannavegi í Árnessýslu. Enginn slaðaðist þó alvarlega. Aðrir þrír voru fluttir á slysadeild eftir mjög harðan árekstur þriggja bíla á Reykjanesbraut í Garðabæ í gærkvöldi. Tveir reyndust lítið meiddir en sá þriðji eitthvað meira. Loka þurfti brautinni í tvær klukkusutndir vegna slyssins. Reiðhestur með öllum reiðtygjum drapst samstundis þegar hann varð fyrir flutningabíl skammt ofan við Borgarnes í gærkvöldi en ökumann bílsins sakaði ekki. Bíllinn skemmdist svo mikið að hann var óökufær á eftir. Tildrög voru þau að eigandi hestsins hafði fallið af baki og meiðst en við það fældist hesturinn upp á veginn og í veg fyrir flutningabílinn. Höggið var svo mikið að skrokkur hestsins kastaðist út fyrir veg. Ökumaður og þrjú börn sluppu ómeidd þegar tvö hjól losnuðu undan flutningabíl á Vesturlandsvegi skammt frá Grundartanga í gærkvöldi og þeyttust á bílinn sem þau voru í. Ökumaður flutningabílsins náði að halda stjórn á bíl sínum eftir atvikið en bíllinn sem maðurinn og börnin voru í skemmdist svo mikið að hann var óökufær. Kastið var svo mikið á dekkjunum að eftir að þau höfðu laskað fólksbílinn þeyttust þau langt út í móa. Ökumaður slapp ómeiddur þegar stór tankbíll, hlaðinn þurrum sandi, valt þegar hann var að komast yfir gatnamót Kringlumýrarbrautar og Miklubrautar í gærkvöldi. Bíllinn valt út fyrir veginn og tók olía og glussi að leka úr honum. Stóreflis krani var kallaður á vettvang til að ná bílnum á réttan kjöl og urðu nokkrar tafir á umferð á meðan. Þá þurftu slökkviliðsmenn að hreinsa vettvang. Bíllinn reyndist númerslaus og þar með ótryggður en nánari skýringar á þessari ökuferð liggja ekki fyrir.