Vilja ekki íslamskan helgidag

Hugmynd eins þingmanna Græningja um að lögfesta íslamskan helgidag sem þjóðarfrídag hefur mætt harðri gagnrýni í Þýskalandi. Jürgen Trittin, umhverfisráðherra flokksins, sem lýsti sig opinn fyrir umræðu um hugmyndinni, fékk að kenna á því og söluhæsta dagblað Þýskalands, Bild, sagði hann hafa tapað glórunni. Þýski þingmaðurinn Hans-Christian Ströble setti hugmyndina fram fyrstur þingmanna og stakk upp á því að tekinn yrði upp íslamskur helgidagur, til dæmis við lok Ramadan, í stað kristilegs helgidags. Síðar sagði hann upptöku íslamsks helgidags ekki þurfa að koma í stað kristilegs helgidags. Stjórnmálamenn úr öllum flokkum hafa lýst sig andvíga hugmyndinni. Marieluise Beck, fulltrúi Græningja í þingnefnd um aðlögun innflytjenda, vísaði henni á bug á þeirri forsendu að hvergi í Þýskalandi væru múslimar í meirihluta. Otto Schily innanríkisráðherra setti sig upp á móti henni og sagði nóg af hátíðisdögum fyrir. "Með fullri virðingu og umburðarlyndi, Þýskaland er land með vestrænar og kristnar rætur," sagði Angela Merkel, leiðtogi Kristilegra demókrata.