Kosningastarfsmönnum rænt í Kabúl

Þremur erlendum kosningastarfsmönnum var rænt í Kabúl í Afganistan í morgun að sögn yfirvalda þar í landi. Starfsmennirnir eru frá Bretlandi, Kosovo og Filippseyjum og er um að ræða tvær konur og einn karlmann. Fólkið var akandi í bíl merktum Sameinuðu þjóðunum þegar sjö vopnaðir menn neyddu bílstjórann, sem er afganskur, til að stöðva bifreiðina, lömdu hann og skipuðu svo hinum þremur inn í aðra bifreið. Samkvæmt Reuters-fréttastofunni hefur ekki náðst í neinn fulltrúa Sameinuðu þjóðanna varðandi málið.