Keyrir framhjá slysstað daglega

Að minnsta kosti ellefu féllu og nokkur hundruð særðust þegar öflug bílsprengja sprakk við sendiráð Ástralíu í Jakarta í Indónesíu í morgun. Bílasprengjan sprakk við fjölfarna umferðagötu í miðborg Jakarta og til marks um það hvað sprengjan var öflug myndaðist fjögurra metra djúpur gígur þar sem bíllinn stóð. Ómar Valdimarsson, sendifulltrúi Rauða Kross Íslands hafði fyrr um morguninn keyrt framhjá ástralska sendiráðinu á leið til vinnu, eins og hann gerir á hverjum degi. Skrifstofa hans er um þrjá kílómetra frá sendiráðinu og segir Ómar að einhverjir samstarfsmanna hans hafi talið sig finna fyrir skjálfta í morgun. Þá hafi um 100 manns frá Rauða krossinum unnið á svæðinu í dag við að koma fólki út úr rústum og koma því á sjúkrahús, dreifa blóði og lyfjum. Grunur leikur á að íslamski öfgahópurinn Jemaah Islamiah hafi komið sprengjunni fyrir en sá hópur er sagður einskonar útibú al-Qaeda í suðaustur-Asíu. Vestræn sendiráð í Jakarta höfðu nýlega hert öryggisráðstafanir sínar enda lék grunur á að einhvers konar hryðjuverkaárás væri í uppsiglingu. Þá eru forsetakosningar fyrirhugaðar í Indónesíu síðar í þessum mánuði og búist er við óróa í tengslum við þær. Ekki er þó vitað hvort árásinni nú er á einhvern hátt beint gegn Ástralíu en skemmst er að minnast þess þegar 202 létust, flestir ástralskir ríkisborgarar, í tveimur sprengingum á eyjunni Balí fyrir tveimur árum. Ómar segir að þetta komi ekki sérstaklega á óvart þar sem alltaf sé hægt að eiga von á hryðjuverkum í landinu. Þetta sé ekki spurning um hvort, heldur hvar og hvenær þær verði. Hann segir miklar öryggisráðstafanir í öllum stærri borgum og mikið leitað að sprengjum í bílum fyrir utan verslanir, veitingastaði og hótel. Á heimili Ómars eru til að mynda vopnaðir verðir. Hann segist því vita af þessari hættu alla daga, þetta sé alltaf að gerast og muni halda áfram að gerast.