Undir bláhimni besta söluvaran

Hlutir sem minna á horfna tíma, eins og sauðskinnsskór og rósaleppar, vekja athygli í Upplýsingamiðstöð ferðamála í Varmahlíð í Skagafirði. Þar eru þeir innan um nýtískulegri muni af ýmsu tagi og þegar farið er að forvitnast kemur í ljós að það er handverkshópurinn Alþýðulist sem stendur að framleiðslunni.

Að sögn Maríu Guðmundsdóttur, einnar úr hópnum, er hann búinn að vera starfandi í nokkur ár. Í honum eru yfir 70 manns á öllum aldri og af báðum kynjum sem aftur tryggir fjölbreytni framleiðslunnar. "Upphaflega lögðu nokkrar konur upp með það að markmiði að halda við gömlu handverki. Svo hefur þetta þróast í allar áttir en áherslan er þó enn á að nota sem mest af íslensku hráefni," upplýsir hún. Meðal listafólks í hópnum nefnir hún Önnu Sigríði Hróðmarsdóttur sem líka er með gallerí í Lundi, örstutt frá Varmahlíð.

María segir handverkshópinn hafa tekið þátt í að fjármagna byggingu hússins sem sölustarfsemin er í og rekið er af sveitarfélaginu.

Sérhönnuðu lopapeysurnar Undir bláhimni og Undir gráhimni, prýddar skagfirskum góðhestum, eru ein vinsælasta söluvaran og eiginlega samnefnari fyrir staðinn. María sýnir húfur og vettlinga í stíl sem hafa verið að bætast við á markaðinn. Þessar hlýlegu flíkur eru líka fáanlegar í Hestamiðstöð Íslands á Sauðárkróki.