Jamie eldar jólamat á Vatnajökli

Sjónvarpskokkurinn frægi, Jamie Oliver, kom til landsins í fyrradag ásamt fjölmennu fylgdarliði en tilefni ferðarinnar er að elda jólamat fyrir ástralska tímaritið Delicious. Leifur Kolbeinsson, eigandi veitingahússins La Primavera, tók á móti kokknum og fór með honum að Vatnajökli í gær þar sem Jamie mun matreiða úr íslensku hráefni í bland við ýmislegt sem hann hafði meðferðis til landsins. Jamie mun dvelja á Íslandi fram á laugardag og eyða mestum tíma uppi á jökli en ætlun tímaritsins var að mynda hann matreiða í snjó. Var því ferðinni heitið til Íslands. Fyrr í vikunni útskrifaði Jamie lærlinga sína sem starfað hafa á veitingahúsinu Fifteen í London en eins og sjónvarpsáhorfendum er kunnugt hefur kokkurinn valið til sín unga einstaklinga og kennt þeim matreiðslulistina miklu. Í vikunni útskrifaðist þriðja hollið sem unnið hefur á veitingastaðnum Fifteen samhliða kokkanámi og nú stendur einnig til að opna veitingastaðinn í Hollandi. Úr herlegheitunum flaug sjónvarpskokkurinn í lítilli einkaflugvél til Íslands og myndaði landið úr háloftunum með farsíma sínum. Myndirnar sendi hann svo samdægurs á heimasíðuna jamieoliver.com en þar er hægt að lesa sig til um helstu fréttir af kokknum og panta matreiðslubækur hans.