Skaust á toppinn eftir skotárás

Rapparinn 50 Cent heldur tónleika í Laugardalshöll á miðvikudag. Í raun heitir hann Curtis Jackson og fæddist inn í harðsvírað eiturlyfjahverfi Queens í New York fyrir 26 árum. Föðurlaus ólst hann upp hjá fátækri móður, tileinkaði sér reglur götunnar og fann fljótt út hvað yrði hans undankomuleið. Áður en rapparinn komst á unglingsaldur fannst móðir hans látin við undarlegar kringumstæður í hverfinu og tóku þá afi hans og amma við uppeldinu. Drengurinn var vel gefinn og góður á bókina en flæktist um fíkniefnaheiminn og var margsinnis handtekinn fyrir smáglæpi. Árið 1999 gerði 50 Cent fyrst vart við sig sem rappari í heimsklassa með laginu "How To Rob" þar sem hann skaut í allar áttir og stuðaði m.a. Jay-Z, Big Pun, Sticky Fingaz og Ghostface Killah. Hipphoppararnir létu ekki slíkan byrjanda komast upp með leiðindi og svöruðu síðar fyrir sig fullum hálsi í lögum sínum. How To Rob var að finna á óútgefinni sólóplötu 50 Cent sem tekin var upp fyrir Colombia Records. Í apríl árið 2000, áður en tónlistarferill 50 Cent náði að blómstra, var rapparanum vart hugað líf. Hann lenti í skotárás við æskuheimilið í Queens og varð fyrir níu byssukúlum, þar af einni í andlitið, en það dugði ekki til að ráða honum bana. Strax í sjúkrarúminu varð til nýtt efni frá 50 Cent sem rapparinn og sveit hans G-Unit gáfu út á plötunni Guess Who´s back? sumarið 2001. Eminem og Dr Dre lýstu yfir stuðningi við 50 Cent þegar önnur plata hans, 50 Cent Is The Future, var tilbúin. Þessar plötur fóru þó aldrei í almenna dreifingu því þær voru gefnar út af kappanum sjálfum. Í kjölfar samstarfsins við Eminem og Dr Dre hefur rapparinn verið betur liðinn meðal starfsbræðra sinna í hipphoppinu og unnið með fjölda þekktra tónlistarmanna. Lag hans, Wanksta þar sem gert er mikið grín af þykjustu glæparöppurum, var gefið út á smáskífu eftir að hafa hljómað í kvikmynd Eminems, 8 Mile. 50 Cent hefur síðan sent frá sér plötuna Get Rich og Die Tryin, sem inniheldur slagarann P.I.M.P, afrakstur samstarfs þeirra Snoop Doggy Dog og fleiri lög sem hljómað hafa á útvarpsstöðvum um allan heim.