Árekstur á tónleikasumrinu mikla

Miðað við stöðugt streymi erlendra listamanna hingað til lands, hlaut það að gerast að tveir stórir tónleikar myndu lenda á sama degi. Nú, þegar Pink hefur tilkynnt um aukatónleika í Laugardalshöll, er ljóst að hún og 50 Cent verða með tónleika á sama degi, 11. ágúst, í Egilshöll. "Þeir vissu vel af þessum seinni Pink-tónleikum þegar þeir ákváðu að vera með 50 Cent," segir Gústaf PS hjá L Promotions sem flytur inn Pink. Þetta fullyrðir hann þrátt fyrir að það hafi ekki verið opinberlega tilkynnt um seinni tónleikana fyrr en fyrir rúmri viku síðan. Uppselt er á fyrri tónleika Pink og Gústaf segist ekki finna fyrir því að tónleikar rappstjörnunnar trufli sölu á seinni tónleikana. Nú þegar er búið að selja um 2000 miða á þá. "Þetta hefur ekki hrjáð okkur ennþá. Salan gengur mjög vel og við höfum engar áhyggjur af því að það verði ekki uppselt á seinni tónleikana líka." Umsjónarmenn tónleika 50 Cent og G-Unit segjast hreinlega ekki hafa reiknað með því að það kæmi til aukatónleika á Pink. Búið er að selja 4000 miða í Egilshöll og því augljóslega nóg eftir af miðum. Valdi Hansen, annar tónleikahaldaranna, virtist þó ekkert sérlega áhyggjufullur. "Þetta er ekki mikið áhyggjuefni, en það hefði verið fínt að komast hjá þessu," viðurkennir hann. Það er því augljóst að barist verður um athygli unglinganna þennan dag enda hefur það aldrei komið fyrir áður í Íslandssögunni að jafn stórar stjörnur keppi sín á milli á íslenskri grundu. Starfsmaður Skífunnar, sem selur miða á báða tónleika, spáir því að það verði hálf tómt á báðum stöðum miðað við þann áhuga sem starfsfólk hefur fundið fyrir. Miðaverð á tónleika 50 Cent og G-Unit er 5.500 kr. í aftari stæði en 6.500 kr. nær sviðinu. Miðaverð á Pink er 5.000 kr. í stæði en 5.900 kr. í stúku.