Imelda er miður sín

Imelda Marcos er miður sín vegna nýrrar heimildarmyndar um ævi hennar og látins eiginmanns hennar og fyrrverandi forseta Filipseyja, Ferdinands Marcosar. Í myndinni er dregin upp ófögur mynd af þeim hjónum og farið ofan í saumana á því, hvernig þau söfnuðu auði með ólöglegum hætti á valdatíma Marcosar. Imelda grét hástöfum við frumsýningu myndarinnar, en grátköst hennar eru nánast jafnfræg og skósafnið hennar, þar sem hundruð eða þúsundir para er að finna. Imelda segir myndina gefa kolranga mynd af þeim hjónum, hið rétta sé að þau hafi helgað ævi sína guði, föðurlandi, sannleikanum og filipseysku þjóðinni.