Orlando Bloom kynþokkafyllstur

Orlando Bloom hefur verið kjörinn kynþokkafyllsti leikari Bretlands í könnun sem sjónvarpsstöðin Sky Movies stóð fyrir. Í öðru sæti lenti Sean Bean, í þriðja Hugh Grant og í því fjórða lenti Ewan McGregor. Bloom, sem er 27 ára, sló í gegn í Hringadróttinssögu í hlutverki Legolas. Næsta mynd hans var Pirates of the Caribbean, sem einnig naut mikilla vinsælda, og nú síðast lék hann í Troy á móti öðrum hjartaknúsara, Brad Pitt. "Venjulega eru það leikarar á borð við Jude Law og Ewan McGregor sem eru kjörnir kynþokkafyllstu leikararnir en nú virðist sem stjarna Orlando Bloom sé að rísa," sagði talsmaður Sky Movies. "Hann hefur leikið í vinsælum myndum nýlega eins og Troy og Pirates of the Caribbean og virðist höfða til allra aldurshópa." Bloom, sem nýlega var kjörin ein af 50 fallegustu manneskjunum í dagblaðinu People, er ekki á lausu. Kærasta hans er bandaríska leikkonan Kate Bosworth, sem er 21 árs.