Toldo hættur með landsliðinu

Ítalski landsliðsmarkvörðurinn Francesco Toldo hefur tilkynnt að hann hafi leikið sinn síðasta landsleik. Toldo, sem leikur með Inter Milan, var varamarkvörður Ítala á EM í Portúgal en hann sló eftirminnilega í gegn á EM 2000 þar sem Ítalir voru aðeins nokkrum sekúndum frá Evrópumeistaratitlinum. Til að mynda varði hann þrjár vítaspyrnur í undanúrslitaleiknum gegn Hollendingum í þeirri keppni. Nú er öldin heldur betur önnur - Ítalir komust ekki áfram úr sínum riðli og Toldo, sem er þrjátíu og tveggja ára gamall, var búinn að missa stöðuna til Gianluigi Buffon - enda finnst honum nú nóg komið: "Ég hefði gjarnan viljað hætta með glæsilegum sigri. Hvað svo sem því líður þá geta þessi vonbrigði nú ekki skyggt á ellefu frábær ár með landsliðinu." Hann sagði ákvörðunina ekki tengjast slælegu gengi Ítala á EM: "Ég var búinn að taka þessa ákvörðun fyrir keppnina en vildi ekki tilkynna um hana fyrr - nú mun ég einbeita mér að ferlinum með Inter," sagði Francesco Toldo, sem lungann úr ferli sínum lék með Fiorentina en var seldur til Inter árið 2001 vegna fjárhagsörðugleika Flórensliðsins.