Fellibylurinn Ívan á leið til Kúbu

Ívani grimma vex enn ásmegin. Fellibylurinn er einhver sá öflugasti sem um getur og stefnir hraðbyri á Kúbu. Þar hefur ríflega milljón manna verið flutt frá þeim svæðum þar sem óttast er að tjónið verið mest. Fellibylurinn Ívan hefur skilið eftir sig slóð eyðileggingar. Á Cayman-eyjum, Jamaíku og Grenada olli hann miklum skemmdum og óttast er að yfir sjötíu hafi týnt lífi í ofsaveðrinu. Á Cayman-eyjum, sem eru afar lágar, náðu flóðöldur heilan kílómetra inn á land og þurftu margir eyjaskeggjar að flýja upp á húsþök til að komast undan vatnsflaumnum. Þök sviptust af húsum og tré rifnuðu upp með rótum. Á Grenada-eyjum varð eyðileggingin gríðarleg og er ástandið þar mjög alvarlegt. 9 af hverjum 10 húsum eru skemmd og vatn og rafmagn vantar, auk þess sem matur er af skornum skammti. Ívan stefnir nú hraðbyri á Kúbu og hefur honum vaxið ásmegin. Bylurinn er nú af stærðargráðunni fimm, sem þýðir að hann getur ekki orðið öflugri. Stjórnvöld á Kúbu hafa flutt 1,3 milljónir manna af vesturhluta eyjarinnar, þar sem búist er við sterkustu hviðunum, allt að sjötíu metrum á sekúndu. Flóðbylgjan í kjölfar Ívans gæti náð allt að átta metra hæð. Á þessari stundu virðist þó sem Ívan skelli ekki af fullum krafti á Kúbu heldur verði það nær Júkatan-skaga í Mexíkó. Þaðan heldur hann væntanlega í átt að Flórída þó að óljóst sé hvað hann beri nákvæmlega niður. Íbúum í Florida Keys var leyft að snúa heim í dag, þar sem Ívan fer að líkindum ekki svo sunnarlega. Hann gæti hugsanlega tekið land nálægt New Orleans í Louisiana-ríki.