Varðskýli lögreglu ófullnægjandi

Vinnueftirlitið hefur lokað varðskýli lögreglumanna við Grænás á Keflavíkurflugvelli þar sem það uppfyllir ekki sett skilyrði. Sýslumaður segir að ráðist verði í úrbætur.  Varðskýlið var innsiglað í gær og tilkynning sett upp um að öll atvinnustarfsemi væri bönnuð í skýlinu samkvæmt íslenskum lögum. Skýlið þykir úr sér gengið, enda hafði það verið tekið úr notkun, en taka þurfti það aftur í notkun vegna breytinga. Jóhann R. Benediktssson, sýslumaður á Keflavíkurflugvelli, segir að það sé vegna þess að fyrirhugaðar úrbætur hafi dregist. Það sé nú í bráðabirgðaástandi því verið sé að gera upp aðalhliðið inn á völlinn. „Þetta er heldur óheppilegt en við leysum það nú fljótt,“ segir Jóhann.  Sýslumaður segir að aðgerðir Vinnueftirlitsins komi ekki alfarið á óvart. Hann segir verkefni hafa farið vaxandi hjá embættinu og því fylgi ákveðnir vaxtarverkir. Hann býst ekki við að sínir menn þurfi að sinna hliðarvörslu utandyra yfir jólin.