Dylan heiðursdoktor í Skotlandi

Söngvarinn goðsagnakenndi Bob Dylan hefur verið gerður að heiðursdoktor í tónlist við St. Andrews-háskólann í Skotlandi. Þetta er aðeins í annað sinn sem Dylan þiggur heiðursnafnbót sem þessa. Síðast var það árið 1970 þegar Princeton-háskóli í Bandaríkjunum heiðraði hann. Dr. Brian Lang, skólastjóri St. Andrews, segir að Dylan hafi verið mikilvægur tákngervingur 20. aldar og textar hans séu enn hluti af vitund okkar. "Við erum mjög ánægð með hafa fengið tækifæri til að heiðra svona merkan listamann," sagði Lang. Bob Dylan heitir réttu nafni Robert Allen Zimmerman. Hann fæddist í Minnesota árið 1941 og fékk fljótt áhuga á tónlist eftir að hafa hlustað á rokkstjörnur eins og Elvis Presley, Jerry Lee Lewis og Little Richard. Í háskóla tók hann upp listamannsnafnið Bob Dylan eftir velska ljóðskáldinu Dylan Thomas. Hann hætti í skólanum 1960 og ákvað að einbeita sér að tónlistinni. Eftir það varð hann einn dáðasti textahöfundur og söngvari heims auk þess sem hann veitti hippunum á sjöunda áratugnum mikinn innblástur. Hafði hann mikil áhrif á hljómsveitir eins og Bítlana og Rolling Stones. Á meðal þekktustu laga Dylan eru Like a Rolling Stone, Mr. Tambourine Man, Blowin´ In The Wind og Knocking on Heaven's Door.