Skrökvuliðar vilja ekki formanninn

„Þetta er akkúrat sú staða sem við óskuðum eftir. Nú getum við dregið hinar hreyfingarinnar að borðinu og knúið þær til einhverskonar samvinnu Aðalhugsunin hjá okkur er að útrýma fylkingum og meirihlutaræðinu," segir Stefán Rafn Sigurbjörnsson, fyrsti maður á lista Skrökvu, félags flokksbundinna framapotara, sem fékk einn mann kjörinn í kosningum til Stúdentaráð Háskóla Íslands sem fóru fram í gær og fyrradag.

Undanfarið ár hefur Vaka, félag lýðræðissinna, haft meirihluta í ráðinu og Röskva, samtök félagshyggjufólks, verið í minnihluta. Fylkingarnar fengu jafnmarga kjörna í stúdentaráð að þessu sinni og því er Skrökva í oddastöðu. Samskonar staða kom upp fyrir nokkrum árum þegar Háskólalistinn bauð fram. Þá mynduðu allar fylkingarnar meirihluta og formaður ráðsins kom frá Háskólalistanum. Ári síðar var Háskólalistinn enn í oddastöðu en þá mynduðu Vaka og Röskva meirihluta án hans.

Stefán vill mynda meirihluta með Vöku og Röskvu. „Já, eða að við verðum í minnihluta og Röskva og Vaka í meirihluta. Við munum velta fyrir okkur öllum möguleikum. Aðalmálið er að fylkingarnar vinni saman."

Stefán á von á því að einhverjar þreifingar forystumanna framboðanna eigi sér stað í dag. Skrökva muni þó ekki gera kröfu um embætti formanns. „Það er á stefnuskrá okkar að fara ekki fram á formannssætið en ég get ekki sagt til um önnur sæti," segir Stefán aðspurður hvort Skrökva muni sækjast eftir formannsembættinu.

Í ár var í fyrsta sinn kosið rafrænt. Kosningaþátttakan var 39,5% sem er 5% meiri en í fyrra. Stefán segir vonbrigði að kosningaþátttakan hafi ekki verið meiri. Hann hafi vonast eftir því að hún myndi stóraukast.