Norskur dómari: Skil dönsku dómarana mjög vel

Kjersti Arntsen, norskur handboltadómari sem hefur dæmt á stórmótum í handbolta, segir að dönsku dómararnir í leik Íslands og Noregs í gær hafi haft talsvert til síns mál þegar þeir dæmdu ekki víti á Vigni Svavarsson á lokamínútu leiksins í gær.

Vignir hélt þá um Myrhol en sleppti honum. Sá norski sneri sér og náði skoti að marki sem Björgvin Páll Gústavsson varði. Ísland tryggði sér svo sigurinn í næstu sókn.

„Það er erfitt að taka skýra afstöðu til þessa máls. En þetta er ekki klárt víti," sagði Arntsen við norska fjölmiðla. „Í reglunum stendur að leikmaður verði að vera rændur 100 prósent marktækifæri, hafa greiða leið að markinu, fulla stjórn á boltanum og eigin líkama til að dæma víti."

„Stærsta spurningin er baráttan á milli Myhol og íslenska leikmannsins. Myrhol fékk á endanum tækifæri til að skjóta á markið án truflunar."

„Það verður að muna að þetta er ákvörðun sem þarf að taka á sekúndubroti og þetta eru vanir dómarar. Ég skil því þeirra ákvörðun þó svo að ég þurfi ekki endilega að vera 100 prósent sammála henni. En ég kaupi það ekki að þetta hafi verið ótvírætt víti."

Stig Nygård, einn handboltasérfræðinga TV2, er á sama máli og skrifar um það á blogginu sínu. Það má lesa hér.