Aron: Ég hélt í mér andanum alla lokamínútuna

Aron Pálmarsson brosti allan hringinn eftir sigurinn lygilega gegn Norðmönnum í kvöld. Aron skoraði fimm mörk í leiknum og gaf nokkrar glæsilegar línusendingar.

"Það var erfitt að elta í seinni hálfleik og dæmið snérist við hjá okkur. Síðast leiddum við og töpuðum en nú eltum við og vinnum. Sem betur fer," sagði Aron og glotti.

"Vörnin datt almennilega í gang síðasta korterið og Bjöggi varði frábæra bolta. Mér fannst sóknarleikurinn frábær eiginlega allan tímann," sagði Aron en hvað með þessu lokamínútu leiksins?

"Hún var ótrúleg. Ég hélt í mér andanum allan tímann. Svo öskraði maður af gleði í leikslok. Þetta er gríðarlega ánægjulegt. Þetta var úrslitaleikur. Ég hefði ekki nennt að fara með tap á bakinu í Slóvenaleikinn.

"Það er sætt að vinna á þennan hátt. Þeir eru búnir að vera að tala um hvað við vorum vondir við þá í síðasta leik. Þess vegna var enn sætara að vinna."