Íslendingar greiða mest allra þjóða með kortum og netinu

Íslendingar eru sú þjóð í heiminum sem notar mest af greiðslukortum og netið til að borga reikninga sína. Íslendingar eru jafnframt í hópi þeirra þjóða sem nota hvað minnst af reiðufé í viðskiptum sínum.

Viðskipti með atvinnuhúsnæði jukust um 3 milljarða

Viðskipti með atvinnuhúsnæði á höfuðborgarsvæðinu jukust um rúma 3 milljarða kr. milli mars og apríl s.l. Kaupsamningum fækkaði hinsvegar töluvert.

Kostnaður við 10% niðurfellingu húsnæðislána er 124 milljarðar

Verði farið í 10% niðurfellingu á höfuðstóli húsnæðislána mun það kosta 124 milljarða króna.

Húsleit Seðlabanka ekki ólögmæt

Hæstiréttur hafnaði í gær kröfu Samherja og tengdra félaga um að húsleit og haldlagning Seðlabankans á gögnum á tveimur starfsstöðvum samstæðunnar yrðu dæmdar ólögmætar og að Seðlabankanum yrði gert að skila öllum haldlögðum og afrituðum gögnum.

Búið að borga um helming af Icesave

Þrotabú Landsbankans á 122 milljarða króna umfram forgangskröfur, sem nema 1.323 milljörðum króna. Þetta kom fram á kröfuhafafundi sem haldinn var í gærmorgun. Þar kynnti slitastjórn bankans kröfuhöfum stöðu eignasafns hans í lok fyrsta ársfjórðungs 2012. Matið miðast við gengi íslensku krónunnar 22. apríl 2009. Í kynningunni kom einnig fram að raunaukning á virði eigna búsins hafi verið tæpir 77 milljarðar króna frá lokum árs 2011. Sé veiking krónunnar gagnvart helstu gjaldmiðlum heims tekin með í reikninginn nemur aukningin á þessu þriggja mánaða tímabili 117 milljörðum króna.

Landsbankinn var á móti kaupum bræðranna

Hópur hluthafa Í Bakkavör Group var á móti því að bræðurnir Ágúst og Lýður Guðmundssynir myndu fá að kaupa allt að 25 prósenta hlut í félaginu í gegnum hlutafjáraukningu fyrir um fjóra milljarða króna. Kaupverðið er töluvert undir matsvirði Bakkavarar Group, en hlutafé félagsins er talið 20-40 milljarða króna virði. Á móti myndi hlutur annarra hluthafa þynnast út.

Myndi kosta hundruð milljarða

Tíu prósenta niðurfærsla allra húsnæðislána myndi kosta 124 milljarða króna og 25 prósenta niðurfærsla kostaði 310 milljarða. Stærstur hluti kostnaðarins myndi falla á Íbúðalánasjóð, eða 67 til 167 milljarðar eftir atvikum. Þá myndu innlánsstofnanir bera 40 til 99 milljarða kostnað og lífeyrissjóðirnir 18 til 44 milljarða.

Slagurinn um stjórn fiskveiða enn eftir

Frumvarp til heildarlaga um stjórn fiskveiða verður tekið fyrir í atvinnuveganefnd Alþingis í dag. Það hefur fallið nokkuð í skuggann af umræðunni um veiðigjaldafrumvarpið, en útlit er fyrir að engu minni ágreiningur verði að þessu sinni. „Ef ósætti er um veiðigjaldafrumvarpið, þá er enn meira ósætti um þetta stóra frumvarp,“ segir Einar K,. Guðfinnsson, þingmaður Sjálfstæðisflokks og fulltrúi í atvinnuveganefnd.

Góður ársfjórðungur hjá Íslandsbanka

Íslandsbanki hagnaðist um 5,6 milljarða króna á fyrsta ársfjórðungi ársins. Til samanburðar var hagnaður bankans 3,6 milljarðar á sama ársfjórðungi síðasta árs en alls hagnaðist bankinn um 29,4 milljarða í fyrra. Rekstrarniðurstaða bankans verður að teljast góð í ljósi helstu arðsemishlutfalla. Var arðsemi eigin fjár á ársfjórðungnum þannig 17,7 prósent og arðsemi eigin fjár af reglulegri starfsemi 15,1 prósent. Sömu hlutföll voru hvor tveggja 11,0 prósent á síðasta ári. Sérstaka athygli vekur að þóknanatekjur bankans jukust um 23 prósent miðað við sama fjórðung í fyrra en þóknanatekjur hafa verið hlutfallslega litlar hjá bönkunum frá bankahruni.

Nóbelsverðlaunahafi segir Grikkland verða að kveðja evruna

Nóbelsverðlaunahafinn Paul Krugman segir að Grikkland verði að yfirgefa evrusamstarfið. Hann segir engan annan valkost í stöðunni en bendir sömuleiðis á að sá sem tekur þá ákvörðun fyrir Grikkland geti um leið kvatt stjórnmálaferil sinn.

Þorsteinn segir dóminn mikil vonbrigði

Þorsteinn Már Baldvinsson, stærsti eigandi Samherja, segir að dómur Hæstaréttar sem féll í dag feli beinlínis í sér að menn hafi ekki rétt á því að leita réttar síns fyrir dómstólum á meðan stjórnvald hefur mál enn til rannsóknar. Þorsteinn segir dóminn mikil vonbrigði enda hafi Samherji hreinlega sýnt fram á að útreikningar Seðlabankans sem byggt er á í málinu séu rangir.

Lækkun húsnæðislána kæmi niður á ríkissjóði

Skýrslu fjármálaráðherra um áhrif lækkunar höfuðstóls húsnæðislána var dreift á Alþingi í dag. Helstu niðurstöður skýrslunnar eru þær að verg niðurfærsla húsnæðislána um 10% myndi kosta 124 milljarða króna. 25% niðurfærsla myndi kosta 310 milljarða.

Hæstiréttur hafnar kröfu Samherja um að gögnum verði skilað

Hæstiréttur hefur hafnað kröfu Samherja um að gögnum sem haldlögð voru í húsleit Seðlabanka Íslands hjá fyrirtækinu verði skilað og að húsleitin sjálf verði úrskurðuð ógild.

Færeyingar hagnast á olíuleit á Drekasvæðinu

Færeyingar leggja til tvö fylgdarskip í rannsóknarleiðangur sem nú er að hefjast vegna olíuleitar á Jan Mayen-hryggnum og sjá fram á að eyjarnar geti orðið áhugaverðar sem þjónustumiðstöð fyrir olíuleit á íslenska Drekasvæðinu. Í frétt á færeyska olíuvefnum oljan.fo kemur fram að leiðangur rannsóknarskipsins Nordic Explorer nýtir Færeyjar sem þjónustuhöfn vegna hljóðbylgjumælinga á Jan Mayen-hryggnum næstu þrjá mánuði.

Búnir greiða 43 prósent af forgangskröfum vegna Icesave

Eignir gamla Landsbankans eru nú metnar á tæplega 1.450 milljarða króna, 122 milljörðum króna meira en forgangskröfur vegna Icesave. Þá hefur bankinn greitt sem nemur fjörutíu og þremur prósentum af forgangskröfum vegna Icesave að því er fram kemur á heimasíðu þrotabús Landsbankans.

Jómfrúarflug WOW Air til Parísar - seinkaði um 45 mínútur

Fyrsta flug íslenska lággjaldaflugfélagsins WOW Air fór í loftið nú rétt fyrir hádegi. Stjórnarformaður segir við hæfi að hefja leik með því að fljúga til borgar draumanna. Fyrsta flugið virðist þó hafa seinkað lítillega, en samkvæmt upplýsingum á vef Keflavíkurflugvallar fór flugvélin á loft 45 mínútum eftir áætlaða brottför.

Þráðlaust net í vélum Icelandair

Icelandair undirritar í dag samning við bandaríska tæknifyrirtækið Row 44 um uppsetningu á þráðlausu interneti í flugflota Icelandair. Farþegar Icelandair mun því geta notað eigin tölvubúnað til að tengjast internetinu. Í tilkynningu frá Icelandair segir að gert sé ráð fyrir að vinna við þetta hefjist strax í haust og verði lokið haustið 2013.

Þjónustujöfnuður óhagstæður um 5 milljarða

Þjónustujöfnuður við útlönd var óhagstæður um 5,1 milljarð á fyrsta ársfjórðungi þessa árs að því er fram kemur í tölum Hagstofunnar. Þar segir að útflutningur á á þjónustu hafi verið 64,5 milljarðar en innflutningur 69,6 milljarðar króna. Þjónustujöfnuður við útlönd á fyrsta ársfjórðungi var því neikvæður um 5,1 milljarð króna.

Verðbólgan 2,6 prósent í Evrópu

Verðbólga á evrusvæðinu mældist 2,4 prósent í maí sl. samanborið við 2,6 prósent í apríl. Frá þessu greindi Hagstofu Evrópu, Eurostat, í morgun. Verðbólgan var minni en flestir greinendur höfðu spáð, að því er greint er frá á vefsíðu Wall Street Journal.

Morgunblaðið: Bakkavararbræður virðast nýta sér fjárfestingaleið SÍ

Félag í eigu Bakkavararbræðra, Korkur Invest ehf., virðist nýta sér fjárfestingaleið Seðlabanka Íslands til þess að kaupa fjórðungshlut í móðurfélagi Bakkavarar, en íslenskir lífeyrissjóðir töpuðu tugum milljarða á fjárfestingu í félaginu. Þetta kemur fram í viðskiptablaði Morgunblaðsins í dag.

Hagnaður Íslandsbanka nam 5,6 milljörðum

Fyrsta árshlutauppgjör Íslandsbanka á árinu var birt í dag. Eigið fé bankans nam 129,4 milljörðum í lok tímabilsins og hækkaði um 5% á ársfjórðungnum. Eiginfjárhlutfall var 23,3% í lok tímabilsins, sem er töluvert umfram það 16% lágmark sem FME setur bankanum.

Vínilplötusala fimmfaldaðist á fyrstu mánuðum ársins

Sala á vínilplötunum fimmfaldaðist á fyrstu fimm mánuðum ársins miðað við sama tíma í fyrra. Árið í fyrra var þó metár en þá þrefaldaðist sala á vínilplötum. Þetta segir Ágúst Guðbjartsson, sem er framkvæmdastjóri Skífunnar. Hann segir að ný kynslóð sé að uppgvöta vínilinn og eldri kynslóðir farnar að dusta rykið af gömlum plötuspilurum.

Útgerðin segir veiðigjaldið bitna verst á heimilum landsins

Framkvæmdastjóri LÍÚ segir frumvarp um veiðigjald á endanum bitna verst á heimilunum í landinu. Þrátt fyrir að breytingatillögur atvinnuveganefndar nái fram að ganga eigi veiðigjaldið eftir að fimmfaldast innan örfárra ára. Meirihluti atvinnuveganefndar Alþingis kynnti í gær breytingatillögur sínar við ríkisstjórnarfrumvarp um veiðigjald. Afar skiptar skoðanir eru um áhrif mögulegra breytinga.

Héraðsdómur varð ekki við kröfu Ragnars Hall

Héraðsdómur Reykjavíkur varð ekki við kröfu Ragnars H. Hall hrl. um að slitastjórn Frjálsa fjárfestingarbankans hf. ætti að segja af sér. Úrskurður þess efnis féll í Héraðsdómi Reykjavíkur 22. maí sl. en það var Ingveldur Einarsdóttir héraðsdómari sem komst að þessari niðurstöðu.

Icelandair Group bætir við rúmlega eitt þúsund starfsmönnum í sumar

Alls eru rúmlega eitt þúsund starfsmenn að hefja störf hjá fyrirtækjum innan Icelandair Group samstæðunnar um þessar mundir. Það er meiri fjöldi en nokkru sinni fyrr á vormánuðum.

Nýtt fasteignafélag stofnað - FAST-1

VÍB, sem er eignastýringarþjónusta Íslandsbanka, Contra fasteignaráðgjöf, Gildi - lífeyrissjóður, Lífeyrissjóður Verzlunarmanna, Festa lífeyrissjóður, Almenni lífeyrissjóðurinn, Lífeyrissjóður starfsmanna sveitarfélaga, Lífeyrissjóður Vestmannaeyja, Tryggingamiðstöðin og Íslandsbanki standa að nýju fasteignafélagi, sem ber heitið FAST-1.

Skipti segja upp 17 manns

Skipti, móðurfélag Símans, ætlar að segja upp 17 starfsmönnum nú um mánaðamótin. Að auki munu 15 starfsmenn Mílu, sem er dótturfélag Skipta, flytjast yfir til Símans. Í tilkynningu frá Skiptum segir að á síðustu misserum hafi verið unnið að hagræðingu í rekstri Skiptasamstæðunnar sem miðar að því að bregðast við minnkandi rauntekjum á fjarskiptamarkaði samhliða verulegri kostnaðarverðbólgu innanlands. Hagræðingaraðgerðir hafi snert öll fyrirtæki samstæðunnar en stærstu dótturfyrirtækin eru Síminn, Míla og Skjárinn. Aðgerðirnar eiga að spara fyrirtækinu 500 milljónir króna.

Glitnir stefnir tugum og vill tuttugu milljarða króna

Slitastjórn Glitnis hefur höfðað tæplega 20 riftunarmál vegna gerninga sem áttu sér stað síðustu sex mánuðina áður en bankinn féll í október 2008. Sumir þeirra voru framkvæmdir rétt áður en að Glitnir fór í þrot. Málin, sem snúast um 20 milljarða króna, voru öll þingfest 24. maí síðastliðinn. Flest málin eru höfðuð gegn innlendum og erlendum fjármálastofnunum.

Bretar og Íslendingar í samstarf um sæstreng og jarðhita

Charles Hendry, orkumálaráðherra Bretlands, og Oddný Harðardóttir iðnaðarráðherra undirrita síðdegis á morgun sameiginlega viljayfirlýsingu landanna um samstarf á sviði orkumála. Undirskriftin fer fram í Hellisheiðarvirkjun. Þetta kemur fram í tilkynningu sem breska sendiráðið og iðnaðarráðuneytið sendu frá sér í dag.

Hlutabréf hér hafa hækkað meira en á hinum Norðurlöndunum

Hlutabréfaviðskipti eru að glæðast aftur hér á landi eftir að hafa nær algjörlega hrunið til grunna mánuðina fyrir hrunið í október 2008 og síðan í kjölfar þess. Þannig hefur vísitala hlutabréfaviðskipta hér á landi, OMXI6ISK, hækkað úr 909 í 1.070 frá áramótum eða um sem nemur tæplega 18 prósentum. Gengi bréfa í Icelandair, Marel og Högum hafa hækkað nokkuð frá áramótum.

Íslenska ríkið sýknað af kröfu þrotabús gamla Capacent

Íslenska ríkið var í dag sýknað í Héraðsdómi Reykjavíkur af kröfu þrotabús GH1, áður Capacent, um að það greiddi til baka 15,9 milljónir króna sem greiddar voru til ríkisins vegna skulda GH1 á opinberrum gjöldum skömmu fyrir þrot þess.

Grænar hækkunartölur í kauphöllinni

Gengi bréfa í félögum sem skráð eru á hlutabréfamarkað Nasdaq í Kauphöll Íslands hefur hækkað hjá þeim flestum í dag. Þannig hefur gengi bréfa í Össuri hækkað um 1,92 prósent og er gengi bréfa félagsins nú 212. Þá hefur gengi bréfa í Icelandair hækkað um 1,07 prósent og er gengi bréfa félagsins 6,6 þegar þetta er skrifað.

Stjórn CCP vill fá heimild til lántöku upp á 2,5 milljarða

Fyrir aðalfundi tölvuleikjaframleiðandans CCP liggur fyrir tillaga stjórnar félagsins um að það hafi heimild til "að taka skuldabréfalán allt að fjárhæð USD 20.000.000 til allt að fimm ára með breytirétti í hlutabréf á tilteknum kjörum og uppgreiðslurétti,“ eins og orðrétt segir í blaðaauglýsingu stjórnar CCP vegna aðalfundarins.

Hafa tekið yfirrekstur verðabréfa- fjárfestingasjóði Byrs

Í framhaldi af sameiningu Íslandsbanka og Byrs hafa Íslandssjóðir hf., dótturfyrirtæki Íslandsbanka, yfirtekið rekstur verðbréfa- og fjárfestingarsjóða Rekstrarfélags Byrs að því er fram kemur í tilkynningu frá Íslandsbanka.

Krugman: Evran var mistök

Paul Krugman, nóbelsverðlaunahafi í hagfræði og pistlahöfundur New York Times, segir að evrusamstarfið hafi verið mistök. Evran sem slík og gallar á myntsamstarfinu hafi skapað þann vanda sem ríkin á svæðinu séu nú að glíma við.

Sparisjóðsskýrsla kemur með haustinu

Rannsóknarnefnd um starfsemi sparisjóðanna fyrir hrun hefur nú tekið skýrslur af sparissjóðsstjórum flestra sparisjóðanna. Skýrsla nefndarinnar, sem verður svipað upp byggð og skýrsla rannsóknarnefndar Alþingis, kemur ekki út fyrir 1. júní eins og að var stefnt heldur með haustinu.

Óvíst að fjárfestingaáætlun ríkisstjórnarinnar sé raunhæf

Greining Arion banka segir óvíst að fjárfestingaáætlun ríkisstjórnarinnar fyrir árin 2013-2015 sé raunhæf. Í Markaðspunktum sínum í dag bendir Greining á að áætlunin eigi ekki að ganga á ríkisfjármálin heldur styðja við þau en gert sé ráð fyrir að fjárfestingar í áætluninni séu fjármagnaðar annars vegar með yfirvofandi hækkun veiðigjalds og hins vegar með arði og sölu eigna ríkisins.

Rekstrarhagnaður Eimskips rúmur milljarður

Heildarvelta samstæðu Eimskips á fyrsta ársfjórðungi ársins 2012 nam 15,3 milljörðum kr. (€ 93,7 m) samanborið við 14,3 milljarða kr. árið 2011.

Landsbankinn selur hlut sinn í Hampiðjunni

Landsbankinn hf. hefur ákveðið að bjóða til sölu allan eignarhlut sinn í Hampiðjunni hf. eða sem nemur 10,93% af útgefnu hlutafé í félaginu. Markaðsviðskipti Landsbankans munu annast sölu hlutanna í opnu útboði byggt á undanþáguheimild frá útgáfu lýsingar í samræmi lög um verðbréfaviðskipti.

Rannsökuðu gjaldþol Milestone

Rannsóknir lögreglumannanna tveggja sem kærðir hafa verið ríkissaksóknara, fyrir brot á þagnarskyldu, tóku til margvíslegra þátta í starfsemi Milestone. Brot á þagnarskyldu getur varðað allt að þriggja ára fangelsi.

Landsbankinn ræðst í niðurskurð - lokar útibúum

Landsbankinn mun ráðast í mikinn niðurskurð, sem felur meðal annars í sér lokun útibúa, á næstunni. Samkvæmt heimildum Vísis verður útibúum víða um land lokað. Ekki hafa fengist nákvæmari upplýsingar um þetta. Þegar óskað var eftir upplýsingum frá Kristjáni Kristjánssyni, upplýsingafulltrúa Landsbankans, um málið sagði hann að tilkynningar frá bankanum væri að vænta.

Telur að hann hafi átt að fá aðgang að gögnunum

Skiptastjóri þrotabús Milestone segir að öll þau gögn sem afhent voru á grundvelli rannsóknarinnar hafi annaðhvort verið í eigu þrotabúsins eða þrotabúinu heimilt að fá aðgang að þeim á grundvelli gjaldþrotalaga. Þetta segir í yfirlýsingu sem Grímur Sigurðsson skiptastjóri þrotabúsins sendi frá sér í dag.

OR semur um breytingar á afborgunum lána

Orkuveita Reykjavíkur hefur samið við Dexia Crédit Local bankann um breytingar á afborgunum lána, meðal annars seinkun gjalddaga árið 2013. Afborganirnar, sem samningurinn nær til, nema um 5,4 milljörðum króna. Samningurinn styrkir framkvæmd aðgerðaáætlunar OR og eigenda hennar sem samþykkt var vorið 2011 og unnið hefur verið eftir síðan. Jafnframt dregur úr þörf OR fyrir erlendan gjaldeyri næstu misserin.

Samherji kærir úrskurð Héraðsdóms Reykjavíkur til Hæstaréttar

Samherji hefur kært úrskurð Héraðsdóms Reykjavíkur, frá því í síðustu viku, til Hæstaréttar Íslands. Málið snýst um húsleit og haldlagningu gagna sem Seðlabanki Íslands framkvæmdi hjá Samherja í lok mars sl. Krafa Samherja í málinu lýtur að því að fá þær aðgerðir dæmdar ólögmætar og að Seðlabankanum verði gert að skila aftur haldlögðum gögnum. Héraðsdómur úrskurðaði í málinu 15. maí og hafnaði kröfu Samherja.

Rauðar tölur lækkunar í kauphöllinni

Gengi hlutabréfa hjá félögum sem skráð eru á markað í Kauphöll Íslands hafa lækkað nokkuð í dag. Þannig hefur gengi bréfa í Össuri lækkað um tæplega 2 prósent og er nú 209. Gengi bréfa í Marel hefur lækkað um 0,32 prósent og er nú 156. Þá hefur gengi bréfa í Högum lækkað um 0,26 prósent og er nú 18,85.