Óvíst að fjárfestingaáætlun ríkisstjórnarinnar sé raunhæf

Greining Arion banka segir óvíst að fjárfestingaáætlun ríkisstjórnarinnar fyrir árin 2013-2015 sé raunhæf. Í Markaðspunktum sínum í dag bendir Greining á að áætlunin eigi ekki að ganga á ríkisfjármálin heldur styðja við þau en gert sé ráð fyrir að fjárfestingar í áætluninni séu fjármagnaðar annars vegar með yfirvofandi hækkun veiðigjalds og hins vegar með arði og sölu eigna ríkisins.

„Þar sem fjármögnun fjárfestingaáætlunarinnar er ekki í hendi telur greiningardeild óvíst að um raunsæja áætlun sé að ræða, a.m.k. ef tekið er mið af tímaramma verkefnisins en stefnt er að því að hefja fyrstu framkvæmdir strax á næsta ári. Óvíst er hver afraksturinn gæti orðið af sölu á hlut ríkisins í bönkunum m.a. vegna gjaldeyrshafta, óvissu um framtíðarskipan fjármálakerfisins og kvótakerfisins og óvissu um gengislán, svo eitthvað sé nefnt. Þá hefur ósætti um veiðigjaldið óhjákvæmilega áhrif á fjármögnun áætlunarinnar," segir Greining Arion banka.

Þá segir Greining að hafa beri í huga að ríkið hafi tekið lán fyrir eignarhlutum í bönkunum sem þýði að ef andvirði hlutanna sé ráðstafað í ofangreindar aðgerðir muni nettó skuldastaða ríkissjóðs bókhaldslega versna.