Nýtt fasteignafélag stofnað - FAST-1

VÍB, sem er eignastýringarþjónusta Íslandsbanka, Contra fasteignaráðgjöf, Gildi - lífeyrissjóður, Lífeyrissjóður Verzlunarmanna, Festa lífeyrissjóður, Almenni lífeyrissjóðurinn, Lífeyrissjóður starfsmanna sveitarfélaga, Lífeyrissjóður Vestmannaeyja, Tryggingamiðstöðin og Íslandsbanki standa að nýju fasteignafélagi, sem ber heitið FAST-1.

Stærð félagsins við stofnun þess er rúmir 6 milljarðar króna en á næstu mánuðum verður fleiri fjárfestum boðin aðkoma að félaginu og er stefnt að því að stækka það upp í allt að 15 milljarða króna síðar á þessu ári, að því er segir í tilkynningu frá Íslandsbanka.

Í tilkynningunni segir enn fremur að mikil vinna hefur átt sér stað síðustu mánuði í tengslum við stofnun félagsins og undirbúnings fyrstu fjárfestinganna. „Fjárfestingarstefna FAST-1 er að fjárfesta í hágæða atvinnuhúsnæði með traustum langtíma leigutökum. Félagið hefur nýverið gengið frá kaupum á þremur fasteignum sem endurspegla fjárfestingarstefnu félagsins. Þessar fasteignir eru Skúlagata 21, Vegmúli 3 og Skútuvogur 1."

VÍB og Contra fasteignaráðgjöf eru ráðgjafar félagsins í uppbyggingu eignasafna og rekstri, að því er segir í tilkynningu. Hluti af starfsemi félagsins verður einnig að gefa út greiningarefni um fasteignamarkaðinn.

Í tilkynningu Íslandsbanka er haft eftir Stefáni Sigurðssyni, framkvæmdastjóra VÍB, að mikill undirbúningur hafi farið í stofnun félagsins. „Við erum afar ánægð með að félagið sé orðið að veruleika en mikill undirbúningur liggur að baki stofnun þess. Við höfum átt frábært samstarf við Contra fasteignaráðgjöf og fagfjárfesta við að skapa þetta verkefni sem er það stærsta sinnar tegundar frá haustinu 2008. Stofnun öflugs aðila á sviði fjárfestinga í atvinnuhúsnæði er mikilvægt skref í að auka fagmennsku í þessum eignaflokki á Íslandi. Áherslan á greiningu og fræðslu er einnig í takt við þetta markmið og stefnu VÍB að leggja áherslu á fræðslu og faglega umræðu um mikilvæg mál á sviði eignastýringar, viðskipta og efnahagsmála."