Vínilplötusala fimmfaldaðist á fyrstu mánuðum ársins

Sala á vínilplötunum fimmfaldaðist á fyrstu fimm mánuðum ársins miðað við sama tíma í fyrra. Árið í fyrra var þó metár en þá þrefaldaðist sala á vínilplötum. Þetta segir Ágúst Guðbjartsson, sem er framkvæmdastjóri Skífunnar. Hann segir að ný kynslóð sé að uppgvöta vínilinn og eldri kynslóðir farnar að dusta rykið af gömlum plötuspilurum.

„Ég held að ástæðan sé sú að fólk sé að fara í svona retro fíling, eða afturábak í tímann, að geta haldið á heilu verkunum. Þetta eru miklu meiri listaverk svona en þegar þú ert með tónlistina í tölvunni. Þú ert í miklu meiri nánd við listaverkið þegar þú ert að handleika það," segir Ágúst.

Ágúst segir að langflestir tónlistarmenn gefi núna út á vínil meðfram geisladiskaútgáfu. Þar nefnir hann Monsters and Men, GusGus, Sigur Rós og Adele. „Það er eiginlega orðin undantekning ef tónlistarmaður gefur ekki út vínilplötu," segir Ágúst.

Ágúst segir aftur á móti að íslensk geisladiskasala hafi staðið í stað en erlend geisladiskasala hafi dalað örlítið.