Bretar og Íslendingar í samstarf um sæstreng og jarðhita

Charles Hendry, orkumálaráðherra Bretlands, og Oddný Harðardóttir iðnaðarráðherra undirrita síðdegis á morgun sameiginlega viljayfirlýsingu landanna um samstarf á sviði orkumála. Undirskriftin fer fram í Hellisheiðarvirkjun. Þetta kemur fram í tilkynningum sem breska sendiráðið og iðnaðarráðuneytið sendu frá sér í dag.

Í viljayfirlýsingunni er lögð áhersla á mikilvægi endurnýjanlegra orkugjafa og samvinnu í þróun jarðhitanýtingar í Bretlandi við uppbyggingu hitaveitu. Einnig er sameiginlegur áhugi á jarðvarma í þróunarlöndum með áherslu á verkefni í Austur Afríku, segja ráðuneytið og sendiráðið. 

Heimsókn breska orkumálaráðherrans til Íslands hefur talsvert verið til umræðu í breskum fjölmiðlum, og hafa stórblöð eins og The Guardian og The Independent gert mest úr möguleikum Breta til að fá orku frá Íslandi um sæstreng og búast við að það verði helsta umræðuefnið.

Bretar eru ekki alls ókunnir jarðvarma því litlar jarðhitavirkjanir eru þegar starfræktar á nokkrum stöðum í Englandi, meðal annars í borgunum Newcastle og Southampton. Þeir hafa áhuga á enn frekari uppbyggingu á þessu sviði og vilja leita í smiðju til Íslendinga.

Á fimmtudagsmorgun mun breski ráðherrann m.a. flytja ávarp á ráðstefnu sem haldin er í Arionbanka og ber yfirskriftina: "Orkumál Evrópu - tækifæri fyrir íslensk fyrirtæki?"

Að ráðstefnunni standa UK Trade & Investment, Arion banki og Orkustofnun. Í fundarboði segir að á evrópskum orkumarkaði séu miklar hræringar. Breytt umhverfi feli í sér ný sóknarfæri fyrir íslensk fyrirtæki. Á ráðstefnunni verður farið ítarlega yfir þessi mál og áhersla lögð á þau tækifæri sem bjóðast íslenskum orkufyrirtækjum.