Slagurinn um stjórn fiskveiða enn eftir

Frumvarp til heildarlaga um stjórn fiskveiða verður tekið fyrir í atvinnuveganefnd Alþingis í dag. Það hefur fallið nokkuð í skuggann af umræðunni um veiðigjaldafrumvarpið, en útlit er fyrir að engu minni ágreiningur verði að þessu sinni.

„Ef ósætti er um veiðigjaldafrumvarpið, þá er enn meira ósætti um þetta stóra frumvarp,“ segir Einar K,. Guðfinnsson, þingmaður Sjálfstæðisflokks og fulltrúi í atvinnuveganefnd.

„Það er, að mínu mati, stórhættulegt fyrir íslenskan sjávarútveg og þjóðarbúið í heild sinni. Það mun stuðla að minni arðsemi og minni möguleikum á því að þjóðin njóti arðs af nýtingu auðlindarinnar. Það mun valda óhagræði í greininni og stuðla að verri nýtingu á miðunum, sóun og ofveiði.“

Einar gagnrýnir einnig framgang meirihluta nefndarinnar, sem hafi nú lagt fram breytingarhugmyndir, en þær taki ekki tillit til tuga umsagna um frumvarpið sem bárust nefndinni.

„Meirihlutinn tekur ekkert mark á því sem þessir aðilar hafa lagt fram. Það er verið að hafa fólk að fíflum og ég hef aldrei fyrr kynnst svona vinnubrögðum á Alþingi.“

Björn Valur Gíslason, framsögumaður nefndarinnar í málinu, segir aðspurður í samtali við Fréttablaðið að viðbúið sé að mikill ágreiningur muni verða um frumvarpið.

„Þessi slagur er að stórum hluta eftir, en nefndin er ekki búin að afgreiða það. Ýmislegt getur því enn breyst.“

Umræður á þingi hafa einkennst af mikilli hörku undanfarið og Björn Valur segist aðspurður sjá fyrir sér lífleg skoðanaskipti um fiskveiðistjórnunarfrumvarpið.

„Þetta er risamál sem hefur klofið þjóðina árum og áratugum saman. Sjávarútvegur stendur samfélaginu nær en aðrar atvinnugreinar, þannig að eðlilegt er að deilur standi um kerfisbreytingar. Við verðum að þola að rætt sé um málið, en við verðum að komast að niðurstöðu því að allt er betra en að halda kerfinu óbreyttu.“

Björn Valur segist allt eins eiga von á að ræðutími verði tvöfaldaður fyrir umræðu á þingi. Það muni því taka langan tíma þó áætluð þinglok nálgist óðum.

„Við erum undir það búin að sitja hér kvöld, nætur og helgar ef út í það fer. Það er mikið líf framundan.“thorgils@frettabladid.is