Rannsökuðu gjaldþol Milestone

Rannsóknir lögreglumannanna tveggja sem kærðir hafa verið ríkissaksóknara, fyrir brot á þagnarskyldu, tóku til margvíslegra þátta í starfsemi Milestone. Brot á þagnarskyldu getur varðað allt að þriggja ára fangelsi.

Mennirnir tveir, Guðmundur Haukur Gunnarsson lögfræðingur og Jón Óttar Ólafsson, doktor í afbrotafræði, unnu að rannsóknum sem tengdust fjárfestingafélaginu Milestone. Þó þeir hafi formlega hætt störfum hjá embætti sérstaks saksóknara um síðustu áramót, þá héldu þeir áfram störfum fyrir embættið í verktakavinnu við yfirheyrslur fram í febrúar á þessu ári.

Í janúar tóku þeir að sér verkefni fyrir þrotabú Milestone sem snérist að því að kanna gjaldþol félagsins frá 2007 og fram á árið 2008. Þessi vinna skilaði sér í skýrslu, en fyrir vinnu sína þáðu þeir tæplega 30 milljónir króna.

Í skýrslu sinni leitast Guðmundur Haukur og Jón Óttar við að svara þremur rannsóknarspurningum.

Í fyrsta lagi með hvað hætti Milestone hafi greitt skuldir sem voru á gjalddaga frá miðju ári 2007 og fram að gjaldþroti félagsins?

Í öðru lagi hvort vísbendingar væru um lögbrot hafi verið framin?

Og síðan í þriðja lagi hvort starfsmenn, stjórnendur og eigendur, þar stærstir Karl og Steingrímur Wernerssynir, hafi talið félagið ógjaldfært einhvern tímann frá miðju ári 2007 og fram að gjaldþroti félagsins?

Í skýrslunni gefa þeir til kynna að mörg lögbrot kynnu að hafa verið framin, og hafa riftunarmál þrotabússins meðal annars verið undirbyggð með þessum gögnum.

Grímur Sigurðsson, skiptastjóri þrotabúss Milestone, sendi frá sér yfirlýsingu í seinnipartinn í dag þar sem hann harmar mjög að vinna mannanna hafi leitt til kæru, en ítrekar að gjaldþrotalögum hafi verið framfylgt í hvívetna hjá þrotabúi Milestone, og rannsóknin beinist ekki að því.

Ólafur Þór Hauksson, sérstakur saksóknari, sagðist í samtali við fréttastofu í gær ekki líta svo að vinna mannanna fyrir embættið, og notkun þeirra á rannsóknargögnum fyrir þriðja aðila, grafi undan rannsóknum sem þeir hafi sinnt. Þar muni fyrst og síðast ráða för, hvort aðgerðir sem til rannsóknar séu hafi falið í sér brot á lögum eða ekki.